Putinin bir gözü Ukraynadadı, bir gözü də Cənubi Qafqazda. Üçüncü şər gözü ABŞ-a, İrana, İsrailə baxır...

Putin hakimiyyəti üçün ABŞ-İsrail birliyinin İrana hücumu lap göydəndüşmə olar. Putin bölgədəki qarışıqlıqdan öz məqsədləri üçün çox ustalıqla istifadə etməklə, mütləq əlinə düşən fürsətdən yararlanacaq. Tək təşvişi Güney Azərbaycandakı canlanmadır. Çünki cənubda azadlıq qazana bilən Azərbaycan Vladimir Putinin görmək istədiyi Rusiyadan ötrü Böyük Depressiya dövrü deməkdir.

Bu ərəfələrdə hərbi, iqtisadi cəhətdən çətin günlərini yaşayan Rusiyanın dövlət başçısı yalançı vədlər verəcək, danışıqları uzadacaq və ya gah masaya oturacaq, gah da masanı tərk edəcək. Yəni özünəməxsus Putin tərzi. Putin Rusiyası Ukraynaya qarşı hücumlarını gücləndirməklə yanaşı, Cənubi Qafqazda da təsirini artırmağa çalışacaq. Buna görə də, ona bu bölgədə gərginlik mütləq lazımdır.

Məğlub Ermənistanın Qalib Azərbaycanla danışıqlara bu qədər yaxın olduğu ərəfədə ermənilərin problem yaşaması, üstəlik də xarici təsirlərdən başını itirmiş Ermənistan iqtidarına Azərbaycan dövləti tərəfindən ünvanlanan konkret təkliflər, həmçinin “ya hərb, ya sülh!” ritorikası, eyni zamanda da rəsmi Bakının haqlı şərtlərinin, təkliflərinin Rusiyanın necə qıcıqlandırdığı hiss olunur.

Əgər Ermənistan yenidən Rusiyaya yön alıb bir yandan da Fransaya arxalansa və yolunu azsa, onda ermənilərin ən böyük düşməni Azərbaycan yox, onların daşnak təfəkkürlü toplumu, Paşinyan hakimiyyəti olacaq.

Azərbaycanın guya müharibəyə hazırlaşması barədə yayılan hər xəbərin arxasında Rusiya dəst-xətti hiss olunur.