ABŞ prezidenti Donald Trampın Avropa Birliyinə (AB) ikitərəfli tariflərin tətbiqi üçün son müddəti uzadacağını elan etdikdən sonra ticarət gərginliyinin azala biləcəyi gözləntiləri ilə neft qiymətləri yuxarıya doğru istiqamət götürdü.

“Brent” markalı neftin barreli 65 dollar civarında, ABŞ xam nefti isə 62 dollardan aşağı satılırdı. Tramp cümə günü gələn ayın əvvəlində AB-ni 50 faiz daha yüksək tarif tətbiq edəcəyi ilə hədələdi, lakin Avropa Komissiyasının sədri Ursula von der Leyen ilə telefon danışığından sonra tərəflərə ticarət razılaşması əldə etmək üçün iyulun 9-na qədər vaxt verdi.

Trampın geniş tarifləri və müvafiq tədbirlərə görə tələbin zəifləməsi səbəbindən neft qiymətləri yanvarın ortalarından etibarən aşağı tendensiya nümayiş etdirir. Bu vəziyyətlə yanaşı, OPEC+ qrupunun hasilatı artırmaq planları da bazarda aşağı istiqamətli təzyiq yaradır. Qrup iyul ayı üçün təchizat siyasətinə qərar vermək üçün bazar günü toplanacaq.

“AB tariflərinin uzadılması bazara qısamüddətli təkan versə də, bu həftə bütün diqqət OPEC+-ın istehsal siyasətinə yönələcək. Biz qrupun ilin ikinci yarısında bazarı lazımi səviyyədə təmin etmək üçün kifayət qədər təchizatını əhəmiyyətli dərəcədə artıracağını gözləyirik", – “ING Group”un əmtəə strategiyasının rəhbəri Varren Patterson deyib.

Bu arada Tramp İranla nüvə danışıqlarında “əhəmiyyətli irəliləyiş” əldə edildiyini bəyan edib və tezliklə danışıqlardan müsbət xəbərlərin gələ biləcəyini bildirib. ABŞ və İran keçən həftə Romada görüşdülər. İranın xarici işlər naziri və baş müzakirəçi Abbas Araqçı bildirib ki, bir neçə görüş ərzində razılıq əldə oluna bilər.