Mayın 9-da bir Bakıda bəzi yerlərdə «Georgiyev lenti»nin paylaması ilə bağlı məsələ hələ də açıq qalır. Çünki «Georgiyev lenti» hazırda Rusiyanın milliyyətçi, hətta şovinist qüvvələrinin rəmzi sayılır. Ukraynada o, artıq separatçıların rəmzinə çevrilib.

Məsələ ondadır ki, «Rusiya Federasiyası vətəndaşlarının vətənpərvər ruhda tərbiyəsi üçün 2011-2015-ci illər üzrə Dövlət Proqramı»nda (Государственная программа «Патриотическое воспитание граждан Российской Федерации на 2011 - 2015 годы») nəzərdə tutulan tədbirlərdən biri də gənclərə Georgiyev lentinin paylanmasıdır. Amma diqqət edin: Rusiya vətəndaşlarının.

Bir qədər əvvələ baxsaq, «Georgiyev lenti»nin paylanması 2005-ci ildən başlayaraq Böyük Vətən Müharibəsində qələbəni xatırlamaq məqsədilə həyata keçirilir. Bu ənənə Rusiya Tələbələr İcması və RİA Novosti Agentliyinin təşəbbüsü ilə başlanılıb. «Vikipedia»nın məlumatına görə, 6 ildə 30-dan çox ölkədə 50 milyondan artıq lent paylanıb ki, həmin ölkələrin arasında Azərbaycan da var.

Əlbəttə, bizim Qələbədə payımız var və bunun anılması yaxşıdır. Amma əgər Georgiyev lentinin özünün məna və mahiyyəti dəyişibsə, o, Rusiya vətənpərvərliyinin simvoluna çevrilibsə, hansı məntiqlə Azərbaycanda paylanılmalıdır?

Ona görə də, 2011-ci ilə qədər bunu anlamaq olardı. Amma 2011-ci ildə , «Rusiya Federasiyası vətəndaşlarının vətənpərvər ruhda tərbiyəsi üçün 2011-2015-ci illər üzrə Dövlət Proqramı» qəbul olunandan sonra anlamaq mümkün deyil.

Georgiyev lenti - Müqəddəs Georgi Ordeni, Georgi xaçı, Georgi medalına əlavə edilən lentdir. Onu həmçinin Georgi bayrağı ilə təltif olunmuş gəmilərin matrosları da daşıyırdılar. 1769-cu ildə imperatriça II Yekatrina tərəfindən təsis olunub. Məqsəd 1768-1774-cü illərdə Rusiya-Türkiyə Savaşında (!) qəhrəmanlıq göstərənləri təltif etmək idi. Rusiya üçün qəhrəmancasına savaşan əsgərlərə verilən mükafatlar onun üzərinə vurularaq, təqdim olunurmuş. Həmin zamanlardan başlayaraq, lentin standartı belədir - 3 qara, 2 narıncı xətt. 1917-ci ildən sonra heç bir sovet mükafatında istifadə olunmayıb, çünki imperiya ödülü sayılırdı. Ona görə, 2011-ci ildən bəzi MDB ölkələrində - məsələn, Belorusda bu lent qadağan olunub.

Aydındır ki, Bakıda Georgiyev lentlərinin paylanmasını Rusiya Səfirliyi təşkil edə bilərdi, çünki bu aksiyanın arxasında Rusiyanın rəsmi qurumlarının dayandığı açıqdır. Amma hazırkı anlamı ilə Rusiyanın gələcək qələbələrinin simvolu sayılan bu lent Azərbaycanda paylana bilməz. Biz öz veteranlarımızı və II Dünya Müharibəsində iştirak etmiş babalarımızı yada salmağı bacarır və bunun yollarını bilirik. Bunun üçün Rusiyadan gələn hansısa lentə isə ehtiyacımız yoxdur. Xüsusilə də əgər həmin lent hazırkı reallıqda tamam başqa bir simvola çevrilibsə.