Azərbaycandan “Sputnik”in yerli bölməsinin əvvəlki rəhbərinin – Vitali Denisovun – təcili şəkildə çıxarılması heç də təsadüfi deyildi. Onun yerini daha ehtiyatlı, amma heç də az maraqlı olmayan İqor Kartavıx tutdu.

Denisov Rusiya Hava Desant Qoşunlarının polkovniki, Rusiya İstintaq Komitəsində, Prezident Administrasiyasında və Müdafiə Nazirliyinin media strukturlarında işləmək təcrübəsi ilə seçilirdi. O, Bakıya 2021-ci ildə gəlmişdi. Bundan əvvəl Kremlə bağlı idarəetmə sistemində fəaliyyət göstərmiş, 2023-cü ildə isə Moldovadan milli informasiya təhlükəsizliyinə təhdid kimi deportasiya olunmuşdu.

Onun yerinə təyin edilən Kartavıx kağız üzərində “jurnalist” statusu daşıyır, əslində isə idarəçi və kurator rolunu oynayırdı. Öz imzası ilə dərc olunmuş məqalələri, reportajları demək olar ki, yoxdur. Onun əsas vəzifəsi redaksiya xəttinə nəzarət və Rusiyanın Bakıdakı diplomatları ilə sıx əlaqə saxlamaq idi. Denisovdan fərqli olaraq, Kartavıx rütbə daşımırdı, amma əvvəlkilərin səhvlərindən nəticə çıxarmışdı: artıq agentləri tanımaq üçün hərbi forma yox, sırf jurnalistikadan uzaq keçmiş kifayət edirdi.

“Sputnik Azərbaycan”ın hazırkı baş redaktoru Yevgeni Belousov da xüsusi qeyd olunmağa dəyər. Onun da klassik mənada jurnalistika ilə əlaqəsi yoxdur – arxasında nə araşdırma yazıları, nə də müəllif şərhləri mövcuddur. Onun əsas ixtisası geosiyasət, təhlükəsizlik və Rusiyanın Cənubi Qafqazdakı maraqlarının qorunması ilə bağlıdır. Belousov ictimaiyyət qarşısında nadir hallarda görünürdü, amma məlumatlı mənbələrin sözlərinə görə, o, daxili kommunikasiya kanallarına çıxış əldə etmiş və siyasi təsir mexanizmləri ilə sıx işləyirdi.

Nəticə etibarilə, bu şəxslərin fəaliyyəti heç də jurnalistika ilə məhdudlaşmırdı. Onların həqiqi missiyası tamam başqa sahədə idi və məhz buna görə bu gün onların fəaliyyəti ətrafında bu qədər suallar yaranır.