Hava dispetçerlərinin tətili Fransada bu gün və sabah üçün planlaşdırılan uçuşlara zərbə vurub. “Ryanair” 170-dən çox uçuşu ləğv edib. Bunun 30 mindən çox sərnişinin tətil planlarına təsir edəcəyi bildirilib.

BBC-nin məlumatına görə, Fransada iki həmkarlar ittifaqının iş şərtlərinə cavab olaraq qəbul etdiyi iki günlük tətil qərarı səbəbiylə paytaxt Parisdəki uçuşların dörddə biri və Nitsa hava limanında uçuşların yarısı ləğv edilib.

Fransanın nəqliyyat naziri Filipp Tabarot qınama bəyanatı verərək, həmkarlar ittifaqlarının tələblərinin və insanların tətildə olduğu belə mühüm bir zamanda qəbul edilən tətil qərarının “qəbuledilməz” olduğunu bildirib.

“Ryanair” tərəfindən edilən şərhdə, tətilin yalnız Fransaya uçuşlara deyil, həmçinin İngiltərə, İrlandiya, İspaniya və Yunanıstana olanlar da daxil olmaqla ölkənin hava məkanından istifadə edən təyyarələrə də təsir etdiyi bildirilib.

“Ryanair”in baş icraçı direktoru Maykl O'Liri hava nəzarətçilərini “pul müqabilində avropalı ailələri girov saxlamaqda” günahlandırıb.

O'Liri Avropa Komissiyasının sədri Ursula Von der Leyeni tətil zamanı minimum xidmət səviyyəsini təmin etmək və Fransa hava məkanından uçan təyyarələri qorumaq üçün təcili tədbirlər görməyə çağıraraq, bunun mənasız olduğunu və tətildə olan AB səyahətçilərinə qarşı dərin haqsızlıq olduğunu bildirib.

Fransanın mülki aviasiya qurumu DGAC həmçinin aviaşirkətlərdən ölkənin bir çox hava limanlarında uçuşları azaltmağı xahiş edib.

Uçuşların xüsusilə sabah kəsiləcəyi, Parisin Şarl de Qoll, Orla və Beauvais hava limanlarında uçuşların 40 faiz azalacağı gözlənilir.

Tətilə çağıran UNSA-ICNA ittifaqı, kadr çatışmazlığı və rəhbərliklə bağlı problemlər də daxil olmaqla bir sıra məsələlərə istinad edib. Birliklə fikir ayrılığı həll edilməyib.

“Ryanair” dünən Yaxın Şərqdəki son münaqişənin onun uçuşlarına da təsir etdiyini, keçən ay 800-dən çox uçuşun ləğv edildiyini deyib. Ləğvlərə baxmayaraq, aviaşirkət iyun ayında 109 mindən çox uçuş həyata keçirib. Şirkətdən verilən açıqlamaya görə, uçuşlarının 1 faizdən az hissəsi vəziyyətdən təsirlənib.