Dünya birjalarında investorlar tarif risklərinə baxmayaraq, şirkətlərin maliyyə hesabatlarında mövcud iqtisadi təzyiqlərə nə dərəcədə davam gətirə bildiyini qiymətləndirməyə çalışırlar.

Vaxt.az xəbər verir ki, ABŞ-ın əsas indekslərindən olan “S&P 500” cüzi — 0,1 faiz artımla tarixində ilk dəfə 6 300 səviyyəsinin üzərində bağlanıb. Enerji sektorunun səhmləri isə neft qiymətlərindəki ucuzlaşma ilə paralel olaraq dəyər itirib.

Çip istehsalçıları “Nvidia” səhmlərinin ucuzlaşması fonunda əvvəlki yüksəlişlərini demək olar ki, geri veriblər. Digər texnologiya nəhəngləri “Tesla” və “Alphabet” (Google) bu həftə maliyyə hesabatlarını açıqlayacaq və investorlar süni intellektlə bağlı xərclərə dair detallara diqqət yetirəcəklər.

ABŞ-ın Xəzinə istiqrazlarının gəlirləri və dolların indeksi zəifləyib. 30 illik istiqrazların gəliri 4 baza bəndi azalaraq 4,95 faizə düşüb, dollar isə inkişaf etmiş ölkələrin valyutaları qarşısında dəyər itirib.

ABŞ və Avropa indekslərinin fyuçersləri mənfi zonadadır. Asiya birjaları da əsasən enişlə ticarətə başlayıb. MSCI Asiya səhmləri indeksi səhər saatlarında qısa müddətli artımdan sonra 0,4 faiz geriləyib.

Bazar ertəsi bayram səbəbilə bağlı olan Yaponiya birjaları, Baş nazir Şigeru İşibanın koalisiyasının həftəsonu keçirilən seçkilərdə geriləməsi fonunda büdcə xərclərinin artacağına dair narahatlıqlarla zəifləyib.

Yen ucuzlaşıb, Yaponiyanın 40 illik dövlət istiqrazlarının gəliri isə artım göstərib. “Bloomberg Dollar İndeksi” dünən günü 0,5 faiz gerilədikdən sonra bu səhər sabit qalıb.