ABŞ-ın “Wall Street” birjaları, bu həftə “Alphabet” və “Tesla” ilə başlayacaq texnologiya sektorunun hesabat dövrü ərəfəsində tarixinin ən yüksək səviyyələrində ticarətini davam etdirir.

“S&P 500” indeksi ümumi olaraq sabit qalsa da, indeks daxilində 400-dən çox şirkətin səhmləri yüksəlib. Texnoloji sektorun simvolu olan “Möhtəşəm Yeddilik” qrupu 9 günlük artım seriyasını dayandırsa da, “Tesla” və “Alphabet” səhmləri hesabat öncəsi yenidən yüksəlişə keçib.

“Google”un ana şirkəti “Alphabet”in ABŞ-da rəqəmsal reklam bazarındakı canlanmadan güc alaraq satış və gəlirdə güclü artım göstərəcəyi gözlənilir.

“Tesla” isə satışlarda azalma yaşasa da, şirkətin avtonom sürücülük texnologiyaları və daha münasib qiymətli modellərlə bağlı planları barədə açıqlamalar verəcəyi ehtimal olunur.

“Bloomberg Intelligence” məlumatına əsasən, “Möhtəşəm Yeddilik” qrupunun ikinci rüb üzrə gəlirləri 14 faiz artacaq. Eyni zamanda, bazarın digər şirkətlərində isə kəskin artım əvəzinə sabitlik gözlənilir.

“New York Life Investments” şirkətindən Loren Qudvin bildirib: “Texnologiya nəhəngləri bazarın sağlamlığı üçün həlledici rol oynamaqda davam edir. Süni intellektə fokuslanan firmaların sektora artım gətirməsi ehtimalı yüksək olaraq qalır.”

Yeni ticarət günündə ABŞ və Avropa fyuçers indeksləri sabitdir. Asiya bazarları isə 1,7 faiz artaraq son bir ayın ən yüksək göstəricisini əldə edib. Bu artım MSCI qlobal səhmlər indeksinin ilin əvvəlindən bəri qazancını 11 faizə yüksəldib.

Dollar indeksi sabit qalmaqda davam edir. ABŞ-ın 10 illik istiqraz gəlirləri isə iki baza bəndi artaraq 4,36 faizə çatıb.

Yaponiyada “Nikkei” 225 indeksi “Toyota Motor Corp.” səhmlərinin 1987-ci ildən bu yana ən yüksək gündəlik artımını göstərməsi fonunda 3,2 faiz yüksəlib. ABŞ–Yaponiya ticarət razılaşması bu səhmləri dəstəkləyib. Yomiuri qəzetinin Yaponiya Baş naziri Şigeru İşibanın istefa verməyi planlaşdırdığına dair xəbəri ilə yen dollar qarşısında zəifləyib.