Neft qiymətləri, ticarət tarifləri ilə bağlı son tarix ərəfəsindəki nikbinlik və dizel bazarlarında yaranmış sıxlığın yaratdığı müsbət ab-hava nəticəsində yüksəlməkdə davam edir.

“Brent” markalı neftin qiyməti bir barel üçün 70 dollara yaxınlaşaraq, dünən yaşanan 1 faizlik artımın ardından yüksəlişini davam etdirib. ABŞ-ın WTI markalı xam nefti isə 66 dolların üzərində ticarət olunur. Hindistanın Ticarət naziri Piyuş Qoyal, ölkəsinin 1 avqustdan əvvəl ABŞ-la razılaşmaya nail ola biləcəyinə əmin olduğunu bildirib. Bu arada, Braziliya və Meksika da ticarət əlaqələrini inkişaf etdirmək axtarışındadır.

Digər tərəfdən, dizel qiymətləri sürətlə artaraq, daha çox dizel hasil edən xüsusi xam neft növlərinə yüksək bonus ödənilməsinə səbəb olub və durğunlaşmış neft bazarına yenidən dinamika qazandırıb. “TotalEnergies SE”yə görə, Avropa İttifaqının Rusiyadan enerji idxalını məhdudlaşdıran son tədbirləri də bu sıxlığa öz töhfəsini verib.

Xam neft bu ay ümumilikdə sabit bir xətt üzrə hərəkət etsə də, OPEC+ qrupunun hasilatı artırması ilə birlikdə ilin əvvəlindən bu yana ümumi eniş müşahidə olunub. Artıq təklif bolluğu ilə bağlı narahatlıqlar da bazarda təzyiq yaratmaqda davam edir. Qrupun növbəti hasilat səviyyəsinə dair görüşü 3 avqust tarixində keçiriləcək.

Qeyd edək ki, Azərbaycan nefti – “Azeri Light” son ticarət sessiyasında 76,07 ABŞ dollar səviyyəsində satılıb.