“Henley & Partners” şirkətinin 2025-ci il üçün hazırladığı Pasport Gücü İndeksi elan olunub. Beynəlxalq Hava Nəqliyyatı Assosiasiyasının (IATA) rəsmi məlumatlarına əsaslanan hesabatda bu il Singapur yenidən dünyanın ən güclü pasportuna sahib ölkə kimi birinci sırada yer alıb.

Singapur təkrar lider: 195 ölkəyə vizasız giriş

Vaxt.az xəbər verir ki, Hesabatda Singapur pasportunun sahibləri 195 ölkəyə vizasız və ya gəlişdə viza ilə səfər edə bilir. Bu isə ümumi 227 mümkün istiqamət arasında ən yüksək göstəricidir.

Yüksələn Asiya: Cənubi Koreya və Yaponiya ikinci sırada

İkinci pillədə Cənubi Koreya və Yaponiya qərarlaşıb – bu ölkələrin vətəndaşları 190 istiqamətə vizasız giriş imkanı əldə edir.

Avropanın klassik gücləri üçüncü sırada

Üçüncü yeri Fransa, Almaniya, Danimarka, Finlandiya, İrlandiya, İtaliya və İspaniya bölüşür. Bu ölkələrin pasportları ilə 189 ölkəyə vizasız səfər mümkündür.

Dördüncü sırada qərarlaşan ölkələr arasında Hollandiya, Belçika, Avstriya, Lüksemburq, Norveç, Portuqaliya və İsveç var. Bu ölkələrin pasport sahibləri 188 ölkəyə vizasız və ya sadələşdirilmiş rejimlə daxil ola bilirlər.

Beşinci və altıncı sıralar – Britaniya geriləyir

Beşinci sırada Yunanıstan, İsveçrə və Yeni Zelandiya yer alır – 187 ölkə.

Altıncı sırada isə Birləşmiş Krallıq (İngiltərə) qərarlaşıb – 186 ölkəyə vizasız giriş. Bu, son illərdə ölkənin ilk sıralardan gerilədiyini göstərir.

Digər pillələrdə vəziyyət belədir:

7-ci sıra – Avstraliya, Çexiya, Macarıstan, Malta, Polşa (185 ölkə)

8-ci sıra – Kanada, Estoniya, Birləşmiş Ərəb Əmirlikləri (184 ölkə)

9-cu sıra – Xorvatiya, Latviya, Slovakiya, Sloveniya (183 ölkə)

10-cu sıra – İslandiya, Litva, ABŞ (182 ölkə)

***

Hesabatda Türkiyə pasportu 46-cı pillədə yer alıb. Türkiyə vətəndaşları 114 ölkəyə vizasız və ya gəlişdə viza ilə səfər edə bilirlər.

***

Azərbaycan, Henley & Partners tərəfindən açıqlanan 2025-ci il Pasport Gücü İndeksində 68-ci yerdə qərarlaşıb. Azərbaycan pasportu ilə 71 ölkəyə vizasız səfər etmək mümkündür.