Neft qiymətləri üç günlük enişin ardından sabitləşib. İnvestorlar, Rusiyadan tədarüklərlə bağlı riskləri qiymətləndirdiyi bir vaxtda ABŞ Prezidenti Donald Trampın Hindistanı Moskva ilə enerji əməkdaşlığına görə cəzalandıracağı barədə bəyanatları bazara təsir göstərib.

“Brent” markalı xam neftin bir bareli 69 dollar səviyyəsindən aşağıda ticarət olunur. Son üç sessiyada ümumilikdə 6 faizdən çox dəyər itirən “Brent”, hazırda sabit qiymət axtarışındadır. ABŞ-ın Qərbi Texas (“WTI”) nefti isə 66 dollar ətrafında qərarlaşıb.

Prezident Tramp Hindistanın Rusiya nefti almaqda israr etməsi səbəbilə bu ölkənin ABŞ-a ixracına tətbiq edilən tariflərin “əhəmiyyətli dərəcədə artırılacağını” bildirib. Hindistan isə bu addımı “ədalətsiz” kimi qiymətləndirib.

Qlobal enerji bazarlarında son üç ayda müşahidə olunan qiymət artımından sonra son günlər azalma tendensiyası müşahidə olunur. Qiymətlərə təsir edən əsas amillər sırasında ABŞ iqtisadiyyatının zəifləməsinə dair əlamətlər və Trampın genişmiqyaslı ticarət tədbirləri ilə yanaşı, OPEC+ ölkələrinin hasilat məhdudiyyətlərini yumşaltması yer alır.

Trampın Hindistana qarşı son xəbərdarlığı, Rusiyaya Ukrayna ilə atəşkəsə gəlməsi üçün verdiyi 8 avqust son tarixindən dərhal əvvəl səsləndirilib. Rusiya xəbər agentliyi TASS-ın məlumatına görə, ABŞ-ın xüsusi nümayəndəsi Stiv Vitkofun çərşənbə günü Moskvaya səfəri planlaşdırılır.

Azərbaycan brendi “Azeri Light” neftinin bir barelinin qiyməti hazırda 1.83 dollar və ya 2.72 faiz ucuzlaşaraq 76,47 ABŞ dolları səviyyəsində qərarlaşıb.