ABŞ-da səhmlərə alış marağı “Wall Street” indekslərinin yüksəlişi ilə nəticələndi. “S&P 500” indeksi gün ərzində 0,73%, “Nasdaq” 100 isə 1,3% artım göstərdi.

Donald Tramp, ABŞ-a investisiya qoymayan şirkətlər üçün çip ixracatına 100% tarif tətbiq etməyi planlaşdırdığını bəyan edib. Bununla paralel olaraq, 100 milyard dollarlıq yeni investisiya planını açıqlayan “Apple”ın səhmləri 5,1% yüksəlib.

ABŞ və Avropa indeksləri yüksəliş ilə ticarətə başlayıb. ABŞ-da 42 milyard dollarlıq 10 illik istiqraz hərracı sakit keçib. İki illik istiqrazların gəlirliliyi isə 1 baza bəndi aşağı düşüb, sonrakı günlərdə isə sabit qalıb.

“Bloomberg Dollar İndeksi” də 0,42% geriləyərək zəif tendensiyasını davam etdirir.

Asiya bazarlarında isə vəziyyət müsbətdir. Trampın çiplərə qarşı tarif qərarına baxmayaraq, ABŞ-a investisiya qoyan şirkətlərin bu vergidən azad ediləcəyi açıqlandıqdan sonra, bazarlar müsbət reaksiya verib. MSCI Asiya Səhmləri İndeksi son iki həftənin ən böyük artımını göstərərək 0,8% yüksəlib. Artıma “Taiwan Semiconductor Manufacturing Co.” və “Samsung Electronics Co.” kimi texnologiya şirkətləri liderlik edib.

Çində isə iyul ixracatı aprel ayından bəri ən sürətli artımını göstərib. Lakin Şanxay birjası bu xəbərə sakit reaksiya verib.

Enerji bazarlarında neft qiymətləri may ayından bəri davam edən enişdən sonra qismən artıb. İnvestorlar həm ABŞ-ın Rusiya nefti alıcılarına qarşı təzyiqlərini, həm də Trampın Ukrayna müharibəsini diplomatik yollarla sonlandırma təşəbbüslərini izləyir.

Üç FED rəsmisindən əmək bazarı ilə bağlı xəbərdarlıq

ABŞ Federal Ehtiyat Sisteminin (FED) üç rəsmisi əmək bazarındakı zəifləməyə diqqət çəkərək, sentyabr ayında faiz endirimi ehtimalına işarə ediblər.

San-Fransisko FED rəhbəri Meri Deyli bildirib ki, əmək bazarının zəifləməsi fonunda “önümüzdəki aylarda” faizlərin endirilməsi vacib ola bilər. Deyli çıxışında deyib:  “Əmək bazarı zəifləyir. Əlavə yavaşlama arzuolunmaz olar. Bu səbəbdən, yaxın aylarda pul siyasətində dəyişikliklər qaçılmaz görünür”.

FED İdarə Heyətinin üzvü Liza Kuk isə iyul ayı əmək hesabatına əsaslanan statistikaların aşağıya doğru yenilənməsi fonunda, bu vəziyyətin iqtisadiyyatda “dönüş nöqtələrində müşahidə olunan tipik hal” olduğunu bildirib.

Minneapolis Fed rəhbəri Nil Kaşkari də iqtisadi zəifləmə və bir sıra statistik göstəricilərdə geriləmə səbəbilə narahatlığını dilə gətirib. “CNBC”yə müsahibəsində deyib: “İqtisadiyyat yavaşlayır. Yaxın perspektivdə federal fond faiz dərəcəsində azalma gündəmə gələ bilər”.

Kaşkari, FED-in 2025-ci ilin sonuna qədər iki dəfə faiz endirməsini gözlədiyini də əlavə edib.

Trampdan FED rəhbərliyi ilə bağlı yeni qərar

ABŞ Prezidenti Donald Tramp, Fed rəhbəri Cerom Pauell vəzifəsini başa vurmazdan əvvəl Adriana Kuglerin boşaltdığı vəzifəyə müvəqqəti təyinat planlaşdırdığını bildirib. Kugler 8 avqustda istefa verdiyini açıqlamışdı.

Trampın qarşısında üç seçim var idi:

Kuqlerin yerinə daimi bir şəxs təyin etmək.

Hələlik müvəqqəti təyinat edib, sonra daimi qərar vermək.

Pauellin əvəzləyicisini müəyyənləşdirib, onu əvvəlcədən Kuglerin yerinə müvəqqəti yerləşdirmək.

Ağ Evdə jurnalistlərə açıqlama verən Tramp, “Yəqin ki, əvvəl müvəqqəti, sonra daimi təyinat edəcəyik. Müvəqqəti təyinat önümüzdəki 2-3 gün ərzində olacaq, ardınca da daimi şəxs açıqlanacaq”, – deyib.