ABŞ dolları Prezident Donald Trampın Federal Ehtiyat Sistemi (FED) İdarə Heyətinin üzvü Liza Kuk (Lisa Cook) ipoteka fırıldağı ittihamı ilə vəzifəsindən azad etməsindən sonra çərşənbə axşamı dəyər itirib. Bu addım mərkəzi bankın müstəqilliyi ilə bağlı narahatlıqları artırıb.

ABŞ Dollar İndeksi – dolların əsas valyuta səbətinə qarşı dəyərini ölçən göstərici – Asiya ticarətində 0,2% geriləyib. Dollar İndeksi üzrə fyuçerslər isə Bakı vaxtı ilə 05:24-də 0,2% ucuzlaşıb.

Xəzinədarlıq istiqrazlarının gəlirliliyi əvvəlcə azalsa da, sonradan bir qədər yüksəlib; 10 illik istiqrazların gəliri 0,3% artaraq 4,2887%-ə çatıb.

Tramp sosial mediada dərc etdiyi məktubda yazıb: “Kukun vəzifədən azad edilməsi üçün kifayət qədər əsas var”.

FED İdarə Heyətində çalışmış ilk afroamerikalı qadın olan Liza Kuk, ipoteka sənədlərində yanıltıcı bəyannamələr verdiyi iddiaları fonunda vəzifədən uzaqlaşdırılıb.

Yapon yeni dollara qarşı möhkəmlənib, dollar/yen məzənnəsi 0,4% azalıb.