Keçən həftə kriptovalyuta bazarları ABŞ Mərkəzi Bankı FED-in gələcək siyasət addımlarına dair artan qeyri-müəyyənliklər və iqtisadi göstəricilər fonunda olduqca dalğalı hərəkət etdi. “Bitcoin” qiymətindəki dəyişkənlik, investor əhval-ruhiyyəsinin və makroiqtisadi amillərin təsirini bir daha ortaya qoydu.

Həftənin əvvəli: FED faiz endirimi ümidləri və qeyri-müəyyənlik

Həftəyə girərkən investorlar FED-in 2024-cü ilin sonrakı dövrlərində faiz endiriminə gedə biləcəyi gözləntiləri ilə bazara istiqamət verdi. Xüsusilə CME “FedWatch” aləti sentyabrda faiz endirimi ehtimalını 70%-in üzərinə çıxararaq bazarda nikbinlik yaratdı. Lakin bu müsbət görünüş “Bitcoin” qiymətlərində artış üçün kifayət etmədi. Bazar ertəsi günü aparıcı kriptovalyuta, qısamüddətli investorların satışları və artan mənfəət götürmə əməliyyatları ilə birlikdə 113 min dolların altına enərək həftəyə zəif başladı.

Həftəsonundakı enişin ardından bazar ertəsi də satış təzyiqi davam etdi və “Bitcoin” 109.274 dollara qədər gerilədi.

Həftənin ortasına doğru: Yeddi həftənin dibi və reaksiya alışları

Həftənin ortasına yaxın “Bitcoin” üzərindəki təzyiq davam etdi. Çərşənbə axşamı BTC/USD cütlüyü FED-in müstəqilliyinə dair artan narahatlıqlar fonunda 108 min dollar səviyyəsinə qədər enərək yeddi həftənin ən aşağı göstəricisini sınaqdan keçirdi. Bu eniş, investorların FED siyasətlərində siyasi təsirin olub-olmayacağına dair davam edən narahatlıqlarının bazardakı risk iştahını necə boğduğunu göstərdi.

Kripto fyuçers bazarında da zəif görünüş hiss olundu. “Coinglass” məlumatına görə, son 24 saatda təxminən 120 milyon dollarlıq mövqe ləğv edildi ki, bunun 91 milyon dolları long (alış) mövqelər idi. Ləğvlərin böyük hissəsi “Bitcoin” fyuçerslərində baş verdi və açıq mövqelərdə təxminən 4% azalma qeydə alındı.

Lakin çərşənbə gününə doğru bazarda müəyyən toparlanma oldu. Xüsusilə gözləniləndən zəif açıqlanan JOLTS iş elanları göstəricisi, FED-in faiz artırımı ilə bağlı tərəddüd edə biləcəyi ehtimalını gündəmə gətirdi. Bu isə riskli aktivlərə marağı yenidən artırdı. Nəticədə “Bitcoin” çərşənbə axşamı test etdiyi yeddi həftənin minimum səviyyəsindən qalxaraq 111 min dollar bandına döndü. Fyuçers bazarında da açıq mövqelərdə məhdud bərpa qeydə alındı; “Bitcoin”in açıq mövqe həcmi 17,2 milyard dollara yüksəldi.

Həftənin sonuna doğru: İnflyasiya göstəriciləri öncəsi dalğalı gediş

Həftənin irəliləyən günlərində bazarlarda yenidən toparlanma siqnalları müşahidə olundu. Cümə axşamı “Bitcoin”, FED faiz endirimi gözləntilərinin güclənməsi ilə birlikdə 113 min dollar civarına qalxdı. ABŞ-da açıqlanan ISM xidmət indeksi iqtisadi ümumi zəifləməyə işarə etdi və bu, “FED faiz endirə bilər” gözləntisini yenidən gündəmə gətirdi. “Bitcoin” fyuçerslərində açıq mövqelər 18,3 milyard dollara yüksələrək investorların yenidən mövqe tutmağa başladığını göstərdi.

Lakin bu yüksəliş uzun sürmədi. Cümə günü açıqlanacaq PCE (Personal Consumption Expenditures – Şəxsi İstehlak Xərcləri) inflyasiya göstəricisi öncəsi investorlar ehtiyatlı davranmağı seçdi. Bu ehtiyatlı yanaşma “Bitcoin” qiymətinin yenidən 111 min dollar səviyyəsinə geriləməsinə səbəb oldu.

Kripto aktivlərdə ümumi görünüş

Həftə ərzində yalnız “Bitcoin” deyil, bir çox kripto aktiv də FED siyasəti və ABŞ iqtisadi göstəriciləri fonunda oxşar istiqamətli hərəkət göstərdi. Ümumilikdə fyuçers əməliyyatlarında həcmin artması və mövqelərin ləğvi bazarın qısamüddətli dəyişikliklərə nə qədər həssas olduğunu göstərdi. Bundan əlavə, “Bitcoin” üçün psixoloji dəstək səviyyəsi kimi qəbul edilən 110 min dollar bandının qorunması investorların bu səviyyədə dip alışı həyata keçirdiyini ortaya qoydu.

Qeyri-müəyyənlik mühiti və qısamüddətli qiymət dalğalanmaları

Ümumilikdə kripto bazarı keçən həftəni qeyri-müəyyənliklər və qarışıq siqnallar fonunda başa vurdu. Faiz endirimi ümidləri zaman-zaman bazara dəstək versə də, qısamüddətli qeyri-müəyyənliklər və makroiqtisadi göstəricilərin gedişi investorların risk iştahasını birbaşa təsirləndirdi. “Bitcoin” qiymətinin 110–113 min dollar səviyyəsində hərəkəti bir daha bazarın istiqamətini müəyyənləşdirməkdə əsas göstəricilərin önəmini göstərdi.

Növbəti günlərdə FED üzvlərinin açıqlamaları və makroiqtisadi məlumatlar kriptovalyuta bazarının istiqamətində əsas həlledici faktor olaraq qalacaq. Investorların ehtiyatlı mövqeyi davam edərkən, bazarlardakı dəyişkənliyin yüksək qalacağı gözlənilir.

Bu həftə ən çox yüksələn və düşən kriptovalyutalar

Ümumi kriptovalyuta bazar dəyəri bu həftə 4,6% azalaraq 3,77 trilyon dollara düşüb. Bazar əhval-ruhiyyəsini ölçən kriptovalyuta qorxu və risk iştahı indeksi də 39 səviyyəsinə enərək “qorxu” zonasına daxil olub. “Bitcoin”in bazar payı həftə ərzində 0,26% artaraq 57,3%-də qalıb və son 3 həftəlik geriləməni dayandırıb. Altcoin indeksi isə 60%-ə yüksəlib.

İlk 100 kriptovalyuta arasında bu həftə ən çox yüksələnlər

“Cronos” (CRO): +113,91%

“MemeCore” (M): +93,92%

“Pyth Network” (PYTH): +59,17%

“Pump.fun” (PUMPf): +12,67%

“KuCoin Token” (KCS): +6,57%

İlk 100 kriptovalyuta arasında bu həftə ən çox düşənlər

“Aerodrome Finance” (AERO): -21,10%

“SPX6900” (SPX): -19,65%

“Pendle” (PENDLE): -18,53%

“Lido DAO” (LDO): -17,64%

“Fartcoin” (FARTCOIN): -16,18%