İsrailin Qətərdə “HƏMAS” terror təşkilatı rəhbərliyinə hücumundan və ABŞ prezidenti Donald Trampın Avropanı Rusiyanın neft alıcılarına gömrük vergisi tətbiq etməyə çağırmasından sonra qiymətlər artıb; lakin zəif bazar mənzərəsi qazancı məhdudlaşdırıb.

“Brent” neftinin fyuçersləri 0,53% (35 sent) artaraq barel başına 66,74 dollara, ABŞ xam nefti isə 0,57% (36 sent) yüksələrək barel başına 62,99 dollara çatıb.

Qiymətlər əvvəlki ticarət günündə İsrailin Dohada “HƏMAS” rəhbərliyinə hücum etdiyini açıqlamasının ardından 0,6% artımla bağlanmışdı. Qətərin baş naziri Məhəmməd bin Əbdürrəhman Əl-Sani bu hücumun “HƏMAS” ilə İsrail arasındakı sülh danışıqlarını poza biləcəyini bildirib.

Neft qiymətlərinin reaksiyası ümumi bazar zəifliyi səbəbindən nisbətən məhdud qalıb. Hər iki göstərici hücumun dərhal ardından təxminən 2% yüksəlsə də, ABŞ-ın Dohaya belə bir hadisənin öz ərazilərində təkrar yaşanmayacağına dair təminat verməsindən sonra geri çəkilib.

“IG” bazar analitiki Toni Saykamor qeydində, “Xam neft qiymətlərinin bu xəbərə verdiyi reaksiya və ABŞ prezidenti Donald Tramp-ın Rusiya neftinə dair sanksiyaları artıra biləcəyinə dair iddialara şübhələr, xam nefti daha aşağı qiymətlər qarşısında həssas vəziyyətdə qoyur”, – yazıb.

Tramp AB-dən Çin və Hindistana 100% vergi tətbiqini istəyir

Mənbələrə görə, Tramp, Rusiya prezidenti Vladimir Putinə təzyiq göstərmək məqsədilə Avropa Birliyindən (AB) Çinə və Hindistana 100% gömrük vergisi tətbiq etməsini istəyib.

Çin və Hindistan Rusiyanın 2022-ci ildə Ukraynanı işğal etməsindən bəri ABŞ-ın sərt sanksiya təzyiqlərinə baxmayaraq, Rusiyanın neftinin ən böyük alıcıları olaraq Moskvanın büdcəsini dolduran ölkələr arasında qalmaqda davam edir.