«İsraildə belə bir deyim var: üç yəhudi olan yerdə dörd fikir mövcuddur. Amma Azərbaycanla bağlı məsələdə İsraildə tam konsensus mövcuddur».

Bakıda «Sülh və Təhlükəsizlik üçün Beynəlxalq Koalisiya»nın təsisində iştirak etdim. Bu təşəbbüs mənə kifayət qədər maraqlı və faydalı göründü. Biz koalisiya çərçivəsində Dağlıq Qarabağ münaqişəsi ilə bağlı həqiqətlərin hər yerə yayılması məsələsini müzakirə etdik.

Koalisiya üzvləri arasında yeganə jurnalist mənəm. Təmsil etdiyim radionun rus, ivrit dilli redaksiyaları var. Neçə illərdir, media sahəsində işləyirəm. Koalisiyada təmsil olunan siyasətçilərdən fərqli olaraq, mən münaqişələr haqqında daha çox danışıram, hətta deyərdim daha təcrübəliyəm. Çünki əvvəllər Ukraynada yaşamışam, burada müzakirə olunan hadisələri yaxından izləmək imkanım olub.

Soyqırım məsələsi İsrail üçün də ağrılı məsələdir. Ona görə azərbaycanlıları anlayırıq. Mən bir jurnalist kimi daim belə konfliktlərə dair məsələlərdən danışmışam.

Məncə, xalqlar öz tarixlərini, xüsusilə də belə soyqırımları yaddan çıxarmamalıdır. İnsanlar öz faciələrini unudarlarsa, sonra həmin faciələr təkrarlanır. Baş verənləri xatırlamaq, uşaqlarımıza danışmaq lazımdır.

Dağlıq Qarabağ münaqişəsi də uzun illərdir davam edir. Nəhayət, bu məsələyə nöqtə qoymaq lazımdır. Buna yalnız müəyyən beynəlxalq proses vasitəsilə son vermək olar. Məsələn, beynəlxalq tribunal keçirilə bilər. Bu tribunal baş verənlərə mənəvi yox, yalnız siyasi və hüquqi qiymətini verəcək, bu məsələdə nöqtə qoya biləcək.

Bunlarla yanaşı, çoxsaylı ölkələrin qatıldığı müxtəlif birliklər, koalisiyaların qurulması lazımdır. Əsas odur ki, bir daha Xocalı soyqırımı, Ruanda genosidi, Kosovodakılar təkrarlanmasın. İtirilən insanları qaytarmaq olmaz, amma haqq-ədalət yerini tapmalıdır.

Mənim işim çox asandır. Mən radioda silsilə verilişlər hazırlayacaq, sizlərin mövqeyini əks etdirəcəyəm. Əgər ermənilər rəyini bildirmək istəsələr, onların da rəyini verəcəyəm. Koalisiyanın görə biləcəyi işlərə gəlincə, burada müxtəlif ölkələrin gənc liderləri, öz ölkələrində minlərlə insanı tələbələri idarə edən adamlar toplaşmışdır. Onlar hansısa suala cavab verə bilməsələr də, bu sualları səsləndirə bilərlər. Azərbaycanın dərdini səsləndirər, öz ölkələrini bu məsələyə münasibət bildirməyə çağırarlar. Deyə bilərlər ki, biz Azərbaycana biganə qala bilmərik, yoxsa özümüzə də laqeyd qalarlar.

Öz hökumətlərinə məruzə edə bilərlər, öz rəsmilərindən bəzi haqiqətləri soruşa bilərlər. Axı siyasi səviyyədə qərar qəbul edə bilənlər mütləq cavab verməlidirlər. Mən də öz adımdan sual ortaya qoyub, bununla bağlı danışa bilərəm.

Mən bu bir neçə gün ərzində insanlarla təmasda oldum və gördüklərimdən çox məmnun qalmışam, azərbaycanlılar haqqında xoş fikirlər formalaşıb. Digər tərəfdən, belə də olmalıdır. İsrail və Azərbaycan arasında yalnız dostluq münasibətləri mövcuddur. Bizim ortaq strateji problemlərimiz, oxşar mövqeyimiz var. Mən İsraildə bununla bağlı kimisə əmin etməli, fikirlərini dəyişməli deyiləm. Çünki onsuz da hər kəs Azərbaycanın dərdini bilir və bölüşür.