Ermənistanda Praqa platformasının uğurundan da danışanlar var, əyər-əskiyindən də. Hakimiyyət özünü öyür, tənqidçilər də öz işində.

Azərbaycanda da uğurdan danışır bir tərəf. Əks tərəf də məğlubiyyətdən. 

Gerçəklik odur ki, sentyabrda sərhəddə baş verənlərdən Qərbdə Ermənistana böyük dəstək qazandırmaq, Rusiya mövqelərini İrəvanda zəiflətmək üçün uğurla istifadə etdilər.

Qərbdən Azərbaycana görünməmiş təzyiq gəldi. Başda ABŞ olmaqla. 

Praqa görüşləri bu ortamda pis olmadı. Bu platforma Azərbaycan üçün ABŞ-ın təşkil etdiyi sərt erməniyönlüdən daha yaxşıdır. Prosesin sonucunda ortaya çıxan bəyannamənin müddəalarının nə qədər ciddi ola biləcəyi tərəflərin sonrakı davranışlarından asılı olacaq.

Praqa bəyannaməsi Ermənistanın Azərbaycanın ərazi tamlığını birmənalı və şərtsiz tanıdığını deməyə əsas vermir. Qarabağda ordu saxlamaqla və silahlı separatizmi dəstəkləməklə Ermənistan gerçəkdə bu bəyanatın əksini düşündüyünü və əksinə davrandığını sübut edir.

Azərbaycan isə Ermənistanın ərazi tamlığını tanımadığını heç vaxt deməyib. Ermənistan tarixi torpaqlar və etnik əhalinin hüquqları adı altında ərazi iddialarında davam edərsə, eynisini Azərbaycanın edəcəyini deyib. 

Təki, Ermənistan silahlılarını tezcə çıxarsın və separatizmi dəstəkləməkdən vaz keçsin. Güman ki, Ermənistan bu siyasəti davam etdirdikcə, Azərbaycan da eynisini edəcəyini səsləndirəcək. 

Yeri gəlmişkən, “Zəngəzurun tarixi torpaqlar olması” söhbətini Zəngəzur keçidi söhbətindən ayrı tutmaq lazımdır. “Dəhliz”, “keçid”, “xüsusi statuslu yol” ayrı məsələdir və Üçtərəfli Bəyanatda nəzərdə tutulub.

Nümunə üçün deyim ki, İstanbuldakı boğazlar Türkiyənindir, amma xüsusi statusu var, gəmilərin keçməsi üçün. Bu status Türkiyənin suverenliyini əlindən almır. Amma boğazdan istifadə edənlərin də hüququnu təmin edir. 

Zəngəzur keçidinin nə statusda olacağı tərəflərin nəyə razılaşacağından asılı olacaq. 

Bir sözlə, Praqa bəyannaməsindəki o bəndin nə olduğunu Ermənistanın yaxın zamandakı davranışından görəcəyik.

Ümid edək ki, sülh sürəci savaşla kəsilməyəcək.

Praqadan sonra Moskva gəlir.