Donald Trampın sirli yeni kripto layihəsinə eyham vurmasından sonra az qala unudulmaq təhlükəsi yaşayan “MAGA token” 50 faizdən çox dəyər qazanıb. Rəsmi olaraq Respublikaçı namizəd və ya onun kampaniyası ilə əlaqəli olmasa da, MAGA token, Trampın “Truth Social”da izləyicilərinə “DeFiant Ones” platformasını təqdim etməsindən sonra iki gün ərzində təxminən 2,65 dollardan 4 dollardan yuxarı qalxaraq sürətlə bahalaşıb. Qiymətdə qəfil 50 faiz artım eyni dövrdə ümumi kriptovalyuta bazarının 1 faizdən az bahalaşmasına baxmayaraq baş verdi.

Keçmiş ABŞ prezidenti “Truth Social”dakı yazısında “DeFiant Ones” layihəsinin “böyük bankların və maliyyə elitalarının” hökmranlığına meydan oxuyacağını bildirib və “Birlikdə dayanmağın vaxtıdır” deyib. O, həmçinin heç bir məlumat verməsə də, 40 mindən çox izləyici toplayan yeni platforma haqqında “DeFiant Ones”ın rəsmi “Telegram” kanalına keçid paylaşıb.

Donaldın oğlu Erik Tramp da bu ayın əvvəlində “New York Post” qəzetinə verdiyi müsahibədə layihənin “rəqəmsal daşınmaz əmlakı” əhatə edəcəyini və maliyyə sənayesində inqilab edəcəyini bildirib. "Bu, ədalətlidir. Hər kəsin dərhal daxil ola biləcəyinə və edə biləcəyinə zəmanət veririk. İnsanlar bunun bank və maliyyə dünyası üçün nə qədər böyük şok olacağını dərk etmirlər. Ümid edirəm ki, biz bunu dəyişməyə kömək edə bilərik”.

Donald Tramp son aylarda kriptovalyuta sənayesindən dəstək toplamağa çalışıb, lakin əvvəllər “Bitcoin”i “fırıldaq” adlandırmışdı. O, iyul ayında “Nashville”də Bitcoin 2024 konfransında əsas çıxış edib. 45 dəqiqəlik çıxışı zamanı o, “milli Bitcoin ehtiyatı” yaratmağa və “Bitcoin və kriptovalyuta prezidentlərinin məsləhət şurası” yaratmağa söz verib.

Özünü “kripto prezidenti” kimi təqdim edən Tramp maliyyə hesabatlarına görə, ABŞ-ın əsas partiyasından kriptovalyuta sahibi olan ilk prezidentliyə namizəddir. Son qazanclara baxmayaraq, MAGA kriptovalyutası Respublikaçıların praymerizlərində bir sıra qələbələrdən sonra fevral ayında bütün zamanların ən yüksək səviyyəsi olan 17 dollardan hələ çox uzaqdadır. Bu qələbələrlə Tramp ardıcıl üçüncü dəfə partiyasının prezidentliyə namizədi oldu.