Fransanın La Reunion adasında yanacağın qiymətlərində ciddi eniş baş verib. 1 aprel 2025-ci il tarixindən etibarən Fransanın ən ucuz yanacaq qiymətləri Hind Okeanındakı Fransanın xarici ərazisi olan La Reunionda olacaq. Prefekturadan verilən açıqlamaya görə, dizelin qiyməti 5 sent, benzinin qiyməti isə 9 sent enəcək.

Dizel 1,24 avro (əvvəllər 1,29) qurğuşunsuz benzin (sans-plomb) 1,57 avroya (əvvəllər 1,66). Bu rəqəmlər Fransada orta hesabla 1,80 avro olan qiymətlərlə müqayisədə nəzərəçarpacaq fərq yaradır.

Təkcə dizel və benzində deyil La Reunionda dəniz sektoru üçün super yanacaq və kənd təsərrüfatı dizel (GNR) kimi məhsulların qiymətləri də aşağı salınıb. Bu ümumi endirim regionda yaşayış bahalığına qarşı tədbir kimi qəbul edilir.

Reunion qubernatorluğu açıqlanan rəqəmlərin tətbiq edilə bilən ən yüksək qiymətlər olduğunu bildirdi. Yəni bəzi rayonlarda və ya stansiyalarda daha ucuz qiymətə yanacaq tapmaq mümkün ola bilər. Bu da sürücülər üçün ayrıca üstünlük yaradır.

La Reunion kimi Fransanın xarici ərazilərində yanacaq qiymətləri çox vaxt dövlət müdaxiləsi ilə müəyyən edilir. Maksimum qiymətləri vergilər, nəqliyyat xərcləri və istehlakçıların alıcılıq qabiliyyəti kimi amillər nəzərə alınmaqla müəyyən edilir. Bu vəziyyət ada sakinləri üçün yanacaq xərclərinin azalmasında özünü göstərir.