Ağ Evin Milli İqtisadi Şura direktoru Kevin Hasset, Birləşmiş Ştatlar Mərkəzi Bankını (Federal Ehtiyat Sistemi – FED) faiz qərarlarına siyasət qarışdırmaqda ittiham edib.

Hasset çərşənbə günü “Fox Business” telekanalına verdiyi müsahibədə bildirib: “Əgər FED-in son bir neçə ildə atdığı addımlara baxsanız, onların səlahiyyətlərindən öncə siyasəti düşündüyünü sorğulamaq mümkündür”.

Hasset, FED-in ötən ilin noyabrında keçirilən prezident seçkilərindən əvvəl faiz dərəcələrini azaltması və bu il dəyişməz saxlaması qərarını “partizan”lığın sübutu kimi dəyərləndirib.

Birləşmiş Ştatlar Mərkəzi Bankı sentyabr ayında faiz dərəcəsini 50 baza bəndi, seçkilərdən sonra isə əmək bazarının zəiflədiyini göstərən siqnallardan sonra iki dəfə 25 baza bəndi endirmişdi.

FED siyasətçiləri, Prezident Donald Trampın tarif artımlarının inflyasiyanı yenidən körükləyə biləcəyi narahatlığını əsas gətirərək, ilin əvvəlindən bəri faiz dərəcələrinə toxunmayıb. FED rəsmiləri, çıxışlarında siyasi qərarlar verdiklərinə dair iddiaları davamlı olaraq rədd ediblər.

Prezident Tramp isə faizləri endirmədiyinə görə FED-i tez-tez tənqid edir. O, həmçinin hökumətin iqtisadi göstəricilərini sorğulayıb və iyul ayına dair zəif məşğulluq hesabatından sonra Əmək Statistikası Bürosunun rəhbəri Erika MakEntarferi vəzifəsindən azad edib.

Tramp, may ayında müddəti başa çatacaq Cerom Pauellin yerinə Kevin Hasseti namizəd göstərdiyini açıqlayıb. Hasset isə MakEntarferin vəzifədən alınmasını dəstəkləyib və Pauellin FED-in faiz qərarlarını müəyyənləşdirən komitəsində siyasi qütbləşmənin qarşısını ala bilmədiyini vurğulayıb.

Hasset deyib: “FED işsizlik və inflyasiya kimi ikili məqsədlərə fokuslanan neytral bir qurum olmalıdır. Amma bu gün tarixdə görünməmiş parçalanma yaşanırsa, deməli rəhbərlik uğursuzluğa düçar olub”.

O əlavə edib ki, FED rəhbərliyinin borcu mülayim bir fikir birliyi formalaşdırmaqdır: “Hazırda gördüyümüz bu deyil. Ona görə də rəhbərlik dəyişməlidir”.

Hasset eyni zamanda bildirib ki, Tramp FED-də rəhbərlik təklif etsə, bu vəzifəni qəbul edəcək. Tramp, FED rəhbərliyi üçün düşündüyü namizədlər arasında keçmiş idarə heyəti üzvü Kevin Varş, Kevin Hasset və daha iki nəfərin adını çəkmişdi.