ABŞ-ın süni intellekt şirkəti “OpenAI” yeni və ən inkişaf etmiş süni intellekt modeli olan “GPT-5”i ictimaiyyətə təqdim edib.

Şirkətin yaydığı məlumata görə, “GPT-5” indiyə qədər hazırlanmış modellər arasında ən ağıllı, sürətli və istifadəsi rahat olanıdır. Model proqram təminatı, riyaziyyat, yazı, səhiyyə, vizual qavrayış və digər sahələrdə qabaqcıl texnoloji imkanlar təqdim edir.

Məlumatda qeyd olunub ki, “GPT-5” əvvəlki versiyalarla müqayisədə süni intellektin məntiq və düşünmə qabiliyyətində əhəmiyyətli sıçrayış yaradır. Yeni model artıq bütün istifadəçilər üçün əlçatandır. Bununla belə, “Plus” abunəçiləri daha geniş istifadəyə, “Pro” abunəçiləri isə daha dəqiq və geniş məntiqi nəticələr üçün “GPT-5 Pro” versiyasına çıxış imkanına malik olacaqlar.

“OpenAI” həmçinin bəyan edib ki, GPT-5 indiyədək hazırlanmış ən güclü kodlaşdırma modelidir. Xüsusilə mürəkkəb ön interfeyslərin hazırlanması və geniş kod bazasında səhvlərin aşkarlanması sahəsində ciddi irəliləyişlər qeydə alınıb.

Yeni modelin estetik həssaslıqla veb-saytlar, tətbiqlər və oyunlar hazırlaya bilməsi, istifadəçi ideyalarını zövqlü və intuitiv şəkildə gerçəyə çevirməsi də şirkətin vurğuladığı yeniliklərdəndir.

Eyni zamanda, “GPT-5”in təkmilləşdirilmiş yazı qabiliyyətləri “ChatGPT”nin gündəlik yazı işlərində – hesabatlar, e-poçtlar, qeydlər və s. – daha funksional olmasına imkan verəcək. İstifadəçilər bu işlər üçün daha səmərəli şəkildə kömək ala biləcəklər.

Digər tərəfdən, “Microsoft” GPT-5 modelini öz məhsullarına inteqrasiya edəcəyini açıqlayıb. Şirkət bu modeli “OpenAI”ın indiyədək yaratdığı ən yaxşı süni intellekt sistemi kimi qiymətləndirib.