ABŞ-ın “Montclair” Dövlət Universitetindən professor Qabriel Rubin tərəfindən aparılan yeni araşdırmaya görə, 1997–2012-ci illərdə doğulan “Z” nəsli gəncləri dünyanı qorxulu bir yer kimi qiymətləndirir. 107 gənclə siyasət, risk və etiraz mədəniyyəti mövzusunda aparılan uzun müsahibələrdə iştirakçıların böyük əksəriyyəti bu fikrə qatılıb və həyatlarını da təhlükəli hesab etdiklərini bildirib.

Vaxt.az “Daily Mail” nəşrinə istinadən xəbər verir ki, Gənclərin ən çox narahatlıq duyduğu sahələr arasında sosial medianın təsiri, iqtisadi qeyri-müəyyənlik, məktəb hücumları, siyasi parçalanma, cinayət səviyyəsi, miqrant hüquqları və psixi sağlamlıq problemləri yer alıb. Professor Rubin bildirir ki, gənclərin qorxuları çox vaxt ölçülə bilən reallıqdan deyil, riskin psixoloji qavrayışından qaynaqlanır: “Gənclər hara baxsalar, risk görürlər.”

Araşdırma göstərir ki, Z nəsli üçün dünya qorxulu görünür. Pandemiya dövründəki məhdudiyyətlər, siyasi qeyri-müəyyənliklər və davamlı onlayn həyat gənclərin risk qavrayışını artırıb. Nəzarət hissini itirən gənclər, gələcəyə dair ümidlərini itirir və bu, risk hissini daha da gücləndirir. İqlim böhranı və həlli çətin görünən digər qlobal problemlər isə xroniki stress və depressiyaya səbəb olur.

“Z” nəsli riskləri “qara-ağ” anlayışı ilə qiymətləndirir, vəziyyətləri ya tam təhlükəsiz, ya da tam təhlükəli hesab edirlər. Professor Rubin vurğulayır ki, bu əvvəlki illərlə müqayisədə qorxulu bir dəyişiklikdir: “2022-ci ildə müsahibələr daha ümidverici idi, illər keçdikcə bədbinlik və ümidsizlik əhəmiyyətli şəkildə artdı”.