Türkiyənin «Sabah» qəzeti Azərbaycan Prezidenti İlham Əliyev və onun xanımı, Heydər Əliyev Fondunun prezidenti, millət vəkili Mehriban Əliyeva haqqında yazı hazırlayıb.

İlkər Ərdoğan adlı müəllifin «Dünyanın belə səmimi gülüşlərə çox ehtiyacı var» başlığı altında yazdığı yazıda Azərbaycanın Birinci xanımı Mehriban Əliyeva haqqında təəssüratlar yer alıb. Məqalədə Birinci vitse-prezidentin səmimiliyinə, onun işgüzarlığına diqqət çəkilib.

VAXT.AZ saytı məqaləni Azərbaycan dilinə uyğunlaşdıraraq, oxucularına təqdim edir.

***

Azərbaycan Prezidenti İlham Əliyevin xanımı Mehriban Əliyevanın səmimi, ürəkdən gələn və rahatlıq gətirən təbəssümü; dünyanın ən çox ehtiyacı olan təbii gülüş şəklini formalaşdırır. Siyasətlə maraqlanmayan və özünü insanlara yardım göstərməyə həsr edən xanım Əliyevanın gülüşü, sanki pis əməllərə «Dayan!» çağırışını edir. 

Dünyanın ən gözəl gülüşü; sülhə səsləyən bir simvol, bir kömək əli… Dəyərli oxucularım, bu gün sizlərə odlar yurdu, dost və qardaş ölkə, bir parçamız Azərbaycan və hörmətli Mehriban Əliyeva xanımla bağlı təəssüratlarımı çatdırmaq istəyirəm. İllərdən bəri Bakıya hər səyahətimdə qurduğum dostluqlar sayəsində Azərbaycan haqqında daha çox məlumat toplayıram. Xüsusən, Türkiyə-Azərbaycan münasibətlərinin dövlət başçıları səviyyəsindəki bağları, iki ölkə xalqını həddən artıq məmnun etməkdə və qardaşlığımızı möhkəmləndirməkdədir. «Bir millət iki dövlət» şüardan gerçəyə çevrilməkdədir.

Nəzakətlə salam verdim, addımlarını yavaşlatdı

Dostlarımın məni Azərbaycana dəvəti 2016-cı ilin iyununda Bakıda ilk dəfə baş tutan «Formula 1» yarışları keçirilən günlərə təsadüf etdi. Yarışları VIP lojadan izləyərkən, çox önəmli iki şəxslə qarşılaşdım. 

Yarışın baş tutduğu bazar günü «Formula 1»in baş meneceri Bernard (Berni) Ekklstoun ilə ayaqüstü söhbətləşmək fürsətim oldu. Berni Ekklstoun, «Formula 1»in İstanbul Qran Prisini yenidən gerçəkləşdirmək istəyini və bu nəhəng layihənin Türkiyəsiz yarımçıq olduğunu söylədi. Yarışın ilk günündə eynı dəhlizdə bu dəfə Mehriban xanım Əliyeva ilə qarşılaşdım. Onlara ayrılan yerə sürətli addımlarla irəliləyirdi. Nəzakətlə salam verdikdə, xanım Əliyeva addımlarını yavaşlatdı və eyni mehriban təbəssümlə salamıma qarşılıq verdi. İllərdir Bakı haqqında düşüncələrim, Azərbaycanın tərəqqisi, inkişafı barədə müşahidələrim və ölkəsinin bu yüksəlişində çox böyük əməyi olan Mehriban xanım Əliyevadan bəhs olunan bu yazını qələmə aldım.

Təbəssüm çox yaraşır

Təbəssüm ona çox yaraşır. Onun üzündəki gülüş, bəlkə də dünyanın ən səmimi, ən mehriban gülüşlərindən biri idi. Ürəkdən gələn bu gülüş dünyaya sülh, əmin-amanlıq, dostluq, qardaşlıq, anlaşmaq çağırışı, uşaqlara ana qayğısı, pis əməllərə isə «DUR!» mesajıdır. Kaş dünyada belə gülüşlər, bu cür gülümsəyən «first lady»lər kifayət qədər olaydı... Bu zaman çağdaş dünyamız qan gölündə boğulmaz, əksinə sülh dənizində üzərdi.

O, ərazi və əhali baxımından çox da böyük olmayan bir məmləkətin prezidentinin xanımıdır. Amma onun beynəlxalq sahədəki fəaliyyətləri, ölkəsini dünya dövlətlərinə olduqca güclü bir şəkildə qəbul etdirir. Bütün bunlar nədən, bu tükənməz enerji haradan qaynaqlana bilər?

Cavab sadədir: Vətən sevgisi, humanizm və Azərbaycançılıq. Həyat yoldaşına olan sədaqət və dəstək. «…Etdiyim yaxşılığı heç kimin bilməməsi ömrüm boyu mənim həyatdakı tək fəlsəfəm olub. Amma təəssüf ki, indi mən bundan məhrumam. Birinci xanım olaraq etdiyim bütün xeyirxah işlər ictimaiyyətlə bölüşülməkdədir. Çox bəyənmədiyim  bu vəziyyət həyatıma bəzi yeniliklər gətirdi və mən bunu olduğu kimi qəbul edirəm» fikri Mehriban Əliyevaya aiddir. Xeyriyyəçilikdən tutmuş ölkənin səhiyyə, təhsil, mədəniyyət, incəsənət, Azərbaycanın beynəlxalq sahədəki imicinin formalaşmasına qədər müxtəlif sahələrdə fəaliyyət göstərən Azərbaycanın Millət vəkili, Heydər Əliyev Fondunu prezidenti, Birinci xanım Mehriban Əliyevanın, öhdəsinə götürdüyü çətin vəzifəni layiqincə davam etdirəcəyinə şübhə yoxdur. Bu fəaliyyətləri ilə o, həm insanlara yardımda edir, həm də yaxşı örnək və əsl bir nümunə olur.

Onun siyasəti insanlara yardım göstərməkdir

Bəzən geri dönüb tarixə baxarkən görəcəksiniz ki, qoca dünyanın qədim vaxtlarında hökmü hər yerə çatan Türk hökmdarları ilə birlikdə, onların xanımlarının da sözü kəsərli olub. Çünki sərkərdə olan hökmdarlar, ömrünün böyük qismini xarici səyahətlərdə, ağır hərbi səfərlərdə keçirdiyi zaman dövlətə, məmləkətə sahib çıxacaq ikinci şəxsə ehtiyac olurdu. Hətta sülh zamanlarında - atların yəhərlərinin açıldığı, qılıncları qınlarına qoyulduğu dönəmlərdə belə, hökmdar xanımları öz vəzifələrini sürdürürdü. Bu ənənə 20-ci əsrdə yox olmağa başlasa da, əsas olan, zamanın unutmağa çalışdığı bu humanist-insani fəaliyyət artıq yeni formada davam etdirilir. Dünyanın ən gözəl təbəssümü - sülhə səsləyən bir simvolu, xeyirxah əli…

Millət vəkili, Azərbaycanın Birinci xanımı, Heydər Əliyev Fondunun prezidenti Mehriban xanım Əliyeva «mən siyasətlə maraqlanmıram, sadəcə insanlara yardım edirəm. Əgər bu siyasət kimi qəbul olunursa buyurun, elə də düşünün» deməklə fikrini hər dəfə təvazökar şəkildə bildirib. Amma reallıq budur ki; xeyirxahlığın, yəni insanlara təmənnasız yardımın özü ən təsirli siyasətdir.

Heç şübhəsiz, asan olmayan işləri həyata keçirmək təsadüf deyil. Heydər Əliyev Fondu fəaliyyət dairəsini müəyyənləşdirərkən bura təhsil, mədəniyyət, səhiyyə, idman və sosial sahələri daxil edildi. Bunlar ancaq Birinci xanımın xüsusi səyləri nəticəsində mümkün oldu. Azərbaycan Prezidenti İlham Əliyev söhbətlərində yürüdülən siyasətin təməlində Azərbaycan insanının dayandığını dəfələrlə vurğulayıb. Ölkənin Birinci xanımı Mehriban Əliyeva bu siyasətin məsuliyyətinin önəmli hissəsini öhdəsinə götürdü. Bu fəaliyyətlər və öhdəyə götürülən missiya «First Lady»ni Azərbaycanda və beynəlxalq arenada layiq olduğu mərtəbəyə yüksəltməkdədir.

Qərb heyranlığını gizlətmir

Azərbaycan, Mehriban Əliyevanın sayəsində Avropanın ədalətsiz olaraq ənənəyə çevrilmiş «anlaşılmaz Şərq» məntiqini kökündən dəyişdirdi. Buna qədər Qərb cəmiyyəti Şərq dövlət başçıları xanımlarının daha çox kölgədə qalmağı üstün tutduqlarını düşünürdü. Amma xanım Əliyeva bu təəssüratı qıraraq Prezident-Birinci xanım tandeminin ölkənin ictimai və sosial həyatında aktiv rol oynadığını nümayiş etdirdi.

Bütün dünya bir daha gördü ki, Birinci xanım, Prezident İlham Əliyevin yürütdüyü siyasi xəttin sosial mesajlarını cəmiyyətə aşılmaqla birlikdə, problemlərin həllində də birbaşa iştirak edir. Bu iki insan, əslində, bir-birini tamamlayır, ortaq bir strategiyanı həyata keçirir. Mehriban Əliyeva qəlibləşmiş siyasi sözlərdən və ifadələrdən istifadə etmir. O, mədəniyyətdən və incəsənət faydalanır. Buna görə də, Avropa mədəniyyətindəki klassik və antik hərəkatlarla bağlı çox geniş məlumatlı bir Birinci xanımla qarşılaşan Qərbin diqqətini Azərbaycana çəkmək daha asan olur. Qərb ictimaiyyəti azərbaycanlı xanımın intellektual səviyyəsinə heyranlığını gizlətmir, Azərbaycana yenidən baxmağa başlayır.

Nəticədə bu, Azərbaycan reallıqlarının qəbul edilməsinə, ölkənin Qərblə münasibətlərdəki sədlərin ortadan qaldırılmasına imkan yaradır. «First lady» ölkəsinin həqiqətlərini, Qarabağ dərdini, Xocalı soyqırımını bütün dünyaya beynəlxalq aləmin qəbul edəcəyi formada izah edir.