Bu sözləri Milli Məclis İnsan hüquqları komitəsinin sədri Rəbiyyət Aslanova Azərbaycanda vəhhabiliyin ölkədə təhlükə yaratmasına münasibət bildirərkən deyib. «Azərbaycanda dini ayinlərin, dini mərasimlərin, dini inamın gerçəkləşməsi qanunvericiliklə tənzimlənir və həyata keçirilir. Bu baxımdan Azərbaycanda insanların dini inanclarını məhdudlaşdıra bilən müddəa yoxdur. Hər bir Azərbaycan vətəndaşı istədiyi dinə etiqad edir. Bu baxımdan ölkədə dini obyektlər fəaliyyət göstərir,  müxtəlif dinlərin davamçıları yaşayır. Həmin gerçəklik o qədər sivil qaydaya uyğun tənzimlənir ki, burada hansısa təhlükənin olmasına imkan yoxdur».

R. Aslanova hesab edir ki, zərərli təriqətlərin insanların həyatında müəyyən rol oynaması mümkün deyil. «1992-ci ildə qəbul edilmiş «Dini etiqad azadlığı haqqında» Qanuna beş il sonra ciddi əlavələr edildi və zərərli təriqətlərin Azərbaycandakı fəaliyyəti birdəfəlik dayandırıldı. Azərbaycan insanı seçimində azaddır, lakin onun böyüklüyü də ondadır ki, o düzgün seçim edir. Doğrudur, müxtəlif ölkələrə sirayət etmək istəyən təhlükələr var. Ancaq İslam dəyərlərini gözəl bilən Azərbaycan insanın milli mənəvi müqavimət qüvvəsi var və onlara da qarşı müqavimət göstərilə bilir. Vəhhabilik və ya digər təriqətlər o zaman məkanda yer tuta bilər ki, dindar onların mahiyyətini anlamamış olsun. Bu gün ancaq əsl dindarın, dini dəyələri yüksək tutan insanların bunları müqayisə etmək imkanı varsa, elə təhlükələrin olmasından qorxmaq lazım deyil və Azərbaycan dindarı o təhlükələri dəf etmək iqtidarındadır. Bu baxımdan belə təhlükələr ayaq alıb yeriyə bilməz».