Ötən gün İranda keçirilən prezident seçkilərinin ilkin nəticələri açıqlanıb. Modern.az xarici KİV-ə istinadən xəbər verir ki, İranın Daxili İşlər Nazirliyində yaradılmış Mərkəzi Seçki Qərargahının rəhbəri Əli Əsgər Əhmədinin verdiyi məlumata görə, indiyədək 41 milyonadək bülleten sayılıb.

O bildirib ki, seçicilərin 22 milyon 796 min 468-i (56.88 faiz) hazırki dövlət başçısı Həsən Ruhaniyə, 15 milyon 452 min 194-ü (38.56 faiz) İbrahim Rəisiyə səs verib.

Səslərin 455 min 211-i (1.14 faiz) Mustafa Mirsəlimə, 210 min 597-si ( 0.53 faiz)  isə Haşimi Təbayə verilib.  Az bir qisim sayılmayan bülleten qalıb. Hazırda həmin  bülletenlərin sayılması prosesi davam edir.

Ancaq artıq Ruhaninin İran prezidenti seçildiyini söyləmək olar.

***

Azərbaycan Respublikasının Prezidenti İlham Əliyev İran İslam Respublikasının Prezidenti Həsən Ruhaniyə təbrik məktubu ünvanlayıb.

VAXT.AZ-ın məlumatına görə, məktubda deyilir: «Hörmətli cənab Ruhani!

İran İslam Respublikasının Prezidenti vəzifəsinə yenidən seçilməyiniz münasibətilə Sizi səmimi qəlbdən təbrik edirəm. Qazandığınız qələbə xalqın Sizə olan inam və etimadının göstəricisi, dost və qardaş ölkənizin inkişafı və rifahı naminə gördüyünüz işlərə verilən yüksək qiymətdir.

Mən Azərbaycan Respublikası ilə İran İslam Respublikası arasındakı münasibətlərə böyük əhəmiyyət verirəm. Strateji əməkdaşlıq səviyyəsinə yüksəlmiş münasibətlərimizin mövcud vəziyyəti məmnunluq doğurur. Ölkələrimiz arasındakı siyasi dialoqu, müxtəlif sahələr üzrə qarşılıqlı maraq doğuran əməkdaşlığı, mədəni əlaqələrimizi, İranın Azərbaycan Respublikasının ərazi bütövlüyünə dəstəyini yüksək qiymətləndirirəm.

İkitərəfli əlaqələrimiz xüsusən son illərdə yüksələn xətlə inkişaf etmiş və yeni məzmun kəsb etmişdir. Sizinlə keçirdiyimiz görüşlər, apardığımız danışıqlar, imzaladığımız sənədlər və həyata keçirdiyimiz layihələr münasibətlərimizin inkişafında mühüm rol oynayır.

İnanıram ki, ortaq mənəvi dəyərləri bölüşən qardaş xalqlarımızın mənafeyinə uyğun olaraq Azərbaycan Respublikası ilə İran İslam Respublikası arasında əlaqələrin daha da möhkəmləndirilməsi, ikitərəfli və çoxtərəfli əməkdaşlığımızın daha da genişləndirilməsi istiqamətində birgə səylərimizi bundan sonra da davam etdirəcəyik.

Sizə möhkəm cansağlığı, xoşbəxtlik, dost və qardaş İran xalqının rifahı naminə qarşıdakı fəaliyyətinizdə uğurlar diləyirəm».