Tanınmış ispan rəssamı Pablo Pikassonun 1947-1964-cü illər arasında hər biri əl ilə rənglənmiş və hazırlanmış yeddi unikal keramika qabı və qab dəsti İsveçrənin Cenevrə şəhərində keçirilən hərracda təxminən 290 min avroya (568 313 manata) satılıb.

Quşlar, balıqlar və keçilər kimi fiqurlarla bəzədilmiş və heç vaxt sərgilənməmiş keramika işləri Fransanın Alpes-Maritimes bölgəsindəki Vallaurisdəki Madoura Keramika Atelyesində hazırlanıb. Onlar 40 ilə yaxın şəxsi kolleksiyada saxlanılırdı.

Satışı həyata keçirən “Piguet” hərrac evi mətbuata açıqlamasında parçaların ümumi təxmini dəyərinin 154 000 avro civarında olduğunu bildirib. Bu o deməkdir ki, hərrac gözlənildiyindən qat-qat uğurlu olub.

“Piguet” bildirib ki, bu rəqəm “bütün formalarda böyük ustadın əsərlərinə ictimaiyyətin marağını əks etdirir”.

“Piguet”in rəsm və heykəltəraşlıq şöbəsinin rəhbəri Adelin Biş Balerna satışdan əvvəl AFP-yə, “Pikasso artıq beynəlxalq səviyyədə tanınan bir rəssam idi. O, bütün böyük və məşhur əsərlərini yaratmışdı və sənətini ifadə etmək üçün yeni yollar axtarırdı”, – deyib.

Keramika sahəsində Pikassonun əsəri üçün indiyə qədər qırılan ən yüksək rekord 1950-ci ildə 2013-cü ildə Londonda “Christie's” hərracında satılan “Grand vase aux femmes voilees” vazasının prototipi olub. Əsər 1,149 milyon avroya satılıb.