Moskva və Tehran yaxşı başa düşürlər ki, Azərbaycan o qədər güclənib ki, ona ultimatum dili ilə danışmaq artıq mümkün deyil. Məhz buna görə də, Bakıya qarşı artıq hibrid hücumlar başlayıb — təhdidlərdən tutmuş media vasitəsilə aparılan qarayaxmalara qədər.

Bu faktlar özünü arxayınlaşdırmaq üçün heç bir əsas qoymur. Rəsmi Bakı üçün indi vaxt çatıb ki, Şuşa Bəyannaməsini real hərbi-strateji dayağa çevirsin. Azərbaycanın ərazisində Türkiyənin müasir türk hərbi bazasının yerləşdirilməsi məsələsinə baxıla bilər. Bu olay sadəcə formallıq yox, güclü siqnal olacaq: hər hansı bir təcavüzkar yalnız Azərbaycanla deyil, həm də müttəfiqlərin birgə gücü ilə üz-üzə qalacaq.

Eyni dərəcədə perspektivli yol – Pakistan hərbi kontingentinin də ölkəyə dəvət edilməsidir. Pakistan ən ağır günlərdə Azərbaycana ardıcıl dəstək verib və hava hücumundan müdafiə, strateji çəkindirmə sahəsində unikal təcrübəyə malikdir. Pakistanla birgə yaradılacaq hərbi-hava bazası Cənubi Qafqazı istənilən düşmən hərbi avantüralarına qarşı effektiv məkana çevirə bilər.

Təəssüf ki, dünya hələ də cəngəllik qanunları ilə yaşayır və bu cəngəllikdə ədalətdən danışan yox, özünü qoruya bilən sağ qalır. Həqiqi təhlükəsizlik pafoslu çağırışlarla yox, zəmanətli güclə qurulur. Məhz bu, Azərbaycanın bu gün tarixdən götürməli olduğu ən mühüm dərsdir.

Böyük Sun Tzunun dediyi kimi, “döyüşmədən düşməni məğlub etmək müharibə sənətinin zirvəsidir”. Azərbaycanda Türkiyənin hərbi bazasının qurulması və Pakistanla birgə hərbi layihələr həmin o vasitədir ki, düşmənlər ilk atəşi açmamış planlarından imtina etsin və özlərini geri çəksinlər.