Avropa Mərkəzi Bankı (AMB) İdarə Heyətinin üzvü Olli Rehn, FED-in müstəqilliyinin on illər sonra ilk dəfə sınağa çəkildiyini qeyd edərək, bunun bazarlar və iqtisadiyyat üçün mühüm risklər yaratdığını bildirdi.

Finlandiyalı rəsmi açıqlamasında, “1980-ci illərdə iki rəqəmli inflyasiyanın nəzarət altına alınmasından bəri FED-in müstəqilliyi toxunulmaz prinsip hesab olunurdu. Lakin bu gün bu prinsip zədələnir. Mərkəzi bankın etibarlılığı olduqda, cəmiyyət, şirkətlər və maliyyə bazarları qiymət sabitliyinə riayət olunacağına inanır. Bu etimad inflyasiya gözləntilərini də möhkəmləndirir”, – deyib.

Rehn vurğulayıb ki, müstəqilliyin gətirdiyi etimad pul siyasətinin effektivliyini artırır və bunun sayəsində mərkəzi banklar müvəqqəti iqtisadi dalğalanmalara sərt müdaxilə etmək məcburiyyətində qalmır.

Son dövrlərdə çox sayda mərkəzi bankçı, faiz endirimləri tələbiylə FED və sədri Cerom Pauelə yönələn artan tənqidlər qarşısında FED-in müstəqilliyini dəstəkləyib.

Son gərginlikdə, ABŞ Prezidenti Donald Tramp, FED İdarə Heyəti üzvü Liza Kuku ipoteka sənədlərində saxtakarlıq iddiaları əsasında vəzifədən azad etmək üçün hərəkətə keçib.

Beynəlxalq Ödənişlər Bankı (BIS) Baş Direktoru Pablo Hernandez de Kos da dünən etdiyi ilk çıxışında mərkəzi bankın müstəqilliyinin inflyasiyanı nəzarət altında saxlamaq və cəmiyyətin rifahına töhfə vermək baxımından həyati əhəmiyyət daşıdığını vurğulayıb.

Rehn Avrozonadakı inflyasiya ilə bağlı qiymətləndirmələrində bildirib ki, qarşıdakı aylara dair proqnoz qeyri-müəyyəndir və o, həm özünün, həm də AMB-dəki həmkarlarının situasiyanı yaxından izlədiyini və lazım gələrsə müdaxiləyə hazır olduqlarını qeyd edib.

AMB-nin, Avropa ilə ABŞ arasında əldə olunan son gömrük vergisi razılaşmasının təsirlərini nəzərə alaraq, sentyabr ayında depozit faizini ardıcıl ikinci ay da sabit saxlaması gözlənilir.