ABŞ Federal Ehtiyat Sistemi (FED) İdarə Heyətinin üzvü Liza Kuk (Lisa Cook), ABŞ Prezidenti Donald Trampın ipoteka (mortgage) iddiaları əsasında onu vəzifədən kənarlaşdırmaq qərarına etiraz edib. Vaşinqtondakı federal məhkəməyə müraciət edən Kuk bəyan edib: “İstefa etməyəcəyəm, vəzifəmi davam etdirəcəyəm”.

Vaşinqton federal dairə məhkəməsində açılan iddiada Trampın yanaşı FED İdarə Heyəti və qurumun sədri Cerom Pauell (Jerome Powell) də cavabdeh tərəflər arasında yer alıb.

Məhkəməyə təqdim olunan ərizədə bildirilir ki, bu iddia Prezident Trampın Kukun vəzifədən kənarlaşdırılmasına dair “misilsiz və qanunsuz” addımına qarşı qaldırılıb və bu qərarın qüvvədə qalması FED İdarə Heyəti tarixində ilk dəfə baş verəcək.

Ərizədə vurğulanır ki, FED qanununa əsasən, idarə heyəti üzvünün vəzifədən uzaqlaşdırılması üçün əsaslı səbəb olmalıdır. Lakin Kukun Senat tərəfindən təsdiq olunmazdan əvvəl verdiyi ipoteka ərizələri ilə bağlı sübuta yetirilməmiş iddialar bu şərti qarşılamır.

Məhkəmədən Trampın Kukla bağlı qərarını qanunsuz və etibarsız elan etməsi və onun idarə heyəti üzvü olaraq fəaliyyətini davam etdirməsi tələb olunub.

Tramp: “İpoteka fırıldağına görə vəzifədən aldım”

ABŞ Prezidenti Tramp bu həftənin əvvəlində FED İdarə Heyəti üzvü Liza Kuku “ipoteka müqavilələrində yanlış məlumat verdiyi” əsas gətirilərək vəzifədən kənarlaşdırdığını açıqlamışdı.

Tramp sosial şəbəkə hesabında Kuk üçün yazdığı məktubu paylaşaraq qeyd edib: “FED İdarə Heyəti üzvlüyü vəzifəsindən dərhal azad edilmisiniz.” Prezident əlavə edib ki, qanun ona “əsaslı səbəb” olduqda üzvü vəzifədən kənarlaşdırmaq səlahiyyəti verir və Kukla bağlı kifayət qədər əsas mövcuddur.

FED üzvü Kuk isə cavabında bildirib: “Prezident Tramp, heç bir hüquqi əsas olmadan və səlahiyyəti çatmadığı halda məni ‘əsaslı səbəb’ adı ilə vəzifədən azad etdiyini iddia edir. Mən istefa verməyəcəyəm. 2022-ci ildən bəri olduğu kimi ABŞ iqtisadiyyatına dəstək vermək üçün öhdəliklərimi davam etdirəcəyəm”.

Kukun vəkili Abbe Louell (Abbe Lowell) isə Trampın bu addımının heç bir hüquqi və faktiki əsası olmadığını vurğulayıb və məhkəmə iddiası qaldıracaqlarını açıqlayıb.