Qazaxıstan prezidenti Nursultan Nazarbayev 2017-ci ilin sonunadək latın qrafikası əsasında əlifba hazırlanmasını təklif edib. Novator.az-ın məlumatına görə, Nazarbayev ölkə mediasında dərc olunmuş məqaləsində belə yazıb.

Prezident bildirib ki, latın qrafikasına keçiddə dərin məntiq var: «Bu, müasir texnologiya, mühit və kommunikasiya, həmçinin 21-ci əsrin təhsil və elmindəki proseslərin özəllikləri ilə bağlıdır. Uşaqlarımız məktəb yaşlarından ingilis dili keçir və latın hərflərini öyrənir. Ona görə də gənc nəsil üçün heç bir çətinlik və maneə yaranmamalıdır. 2017-cı ilin sonunadək alimlərin və cəmiyyətdə müzakirələrin köməyi ilə əlifbanın yeni qrafik standartını qəbul etmək lazımdır».

Qazaxıstan prezidenti məqaləsində qeyd edib ki, 2018-ci ildən yeni əlifbanın tədrisi üzrə mütəxəssislərin və orta məktəblər üçün dərsliklərin hazırlanmasına başlamaq lazımdır. Nazarbayev məqaləsində ilk dövrdə latın qrafikası ilə yanaşı kiril əlifbasının da istifadə olunacağını qeyd edib.

Qazaxıstan latın qrafikasına keçidi gələn il başlayıb 2025-ci ildə başa çatdırmaq istəyir.