Azərbaycan Dövlət Televiziya və Radio Verilişləri» QSC-nin sədri Arif Alışanovun ibtidai istintaqa verdiyi ifadə məlum olub. Zərərçəkmiş şəxs qismində dindirilən Arif Alışanov ifadəsində bildirib ki, (APA) təxminən 2007-ci ilin ortalarında Şamaxı rayonunda torpaq almaq qərarına gəlib və bu məqsədlə rayonunun Nağaraxana kənd sakini Əkbərov Şücaət Allahverdi oğlu ilə tanış olub.

Az.TV sədri nəql edib ki, bu tanışlıqdan sonra Şücaətlə aralarında yaxşı münasibət yaranıb. 2012-ci ildə Alışanov  qardaşım Habili, yeznəsi Vidadi Cəfərovu, qayınları – Etibar, Natiq Bağırovları da kənd təsərrüfatı ilə məşğul olmağa, yəni ortaq biznesə cəlb edib, torpaqların yerli sakinlərdən satın alınmasında Şücaət Əkbərovdan kömək istəyib.

Baş tutmayan bu biznesə 2012-ci ildən 2016-cı ilədək hissə-hissə qardaşı Habil 200 000 manat, yeznəsi Vidadi 200 000 manat, qaynı Etibar 1 800 000 manat, digər qaynı Natiq 3 500 000 manat, özü isə 500 000 manat – cəmi 6 milyon 200 min manat qoyaraq kənd təsərrüfatı və turizmlə məşğul olmaq qərarına gəliblər.

Alışanovun ifadəsindən: «Xaricdən mütəxəssislər dəvət etdik, hansı ərazilərində qoz və fındıq bağlarının salınmasının mümkün olmasını müəyyənləşdirib, torpaqların alınması ilə bağlı Şücaət Əkbərova müraciət etdim. 2014-cü ilin iyulunda Şücaət Əkbərov bizə Nağaraxana kəndindən Pirqulu kəndinə gedən yoldan təxminən 500 metr aralıda 50 hektar torpaq sahəsini göstərib, həmin yerlərin turizm təyinatlı olduğunu, hektarının 30 000 manatdan satıldığını bildirdi. Həqiqətən də mənzərəli torpaqlar olduğunu gördüyüm üçün gələcəkdə həmin ərazidə turizmlə bağlı obyekt salmaq məqsədilə almağa razılaşdım».

Beləliklə, bu sövdələşmədən sonra Alışanov pulu hissə-hissə Şücaətə verib. Şücaət Əkbərov bir neçə aya torpağı satan şəxslərlə görüşüb, razı salaraq pulları ödəyəcəyini və alqı-satqı ilə rəsmiləşdirib, çıxarışını alacağını vəd edib. Lakin Şücaət Əkbərov həmin 50 hektar torpaq sahəsi üçün 1.5 milyon manatı almasına baxmayaraq, torpaqların alınması üçün heç bir iş görməyib. Başqa sözlə, Az.TV sədrinə «atıb».

2014-cü ilin fevral ayında Şücaət Əkbərov Alışanova Şamaxı rayonu Nağaraxana kəndin mərkəzində yerləşən yüksəklikdəki 3,48 hektar kənd təsərrüfatlı təyinatlı torpaqları göstərib 1 hektarının 50 min manata satıldığını deyib.

Sitat: «Mən həmin torpağı almağa razılıq verdikdən sonra 2014-cü ilin fevral ayının sonlarında Şücaət Əkbərova Şamaxı rayonunda həmin torpağın alınması üçün 174 min manatı tanışım Camal Nəbiyevin yanında verdim. 2014-cü ilin aprel ayında Şücaət həmin torpağın çıxarışını sürücüm Hacı Babayevin adına rəsmiləşdirdi. İstintaq zamanı məlum oldu ki, Şücaət Əkbərov məni aldadaraq, Şamaxı rayonu Nağaraxana kəndində göstərdiyi torpağı deyil, Kürdəmirdə hektarı 500 manata satılan torpağın hektarını 50 min manata sataraq dələduzluqla 174 min manatı mənimsəyib».

Alişanov bildirib ki, Şamaxıda bir neçə torpaq sahəsini bəyənib və almaq istəyib. Həmin torpaqların pulunu Ş. Əkbərova ödəyib, lakin sonradan rəsmiləşdirilən sənədlərdən torpaqların Kürdəmir rayonunda olduğu üzə çıxıb.

Az.TV sədri deyib ki, onun Şücaət Əkbərov vasitəsi ilə vətəndaşlardan pay torpaq sahələrini almağımın əsas səbəbi onun yerli sakin kimi kənd camaatı ilə tez dil tapıb həmin sahələri ala bilməsi olub.

«Şücaətə yaxın adam kimi etibar etmişəm. Aqrar təsərrüfatı qurandan sonra Şücaət Əkbərovu oraya rəhbər təyin etmək fikrim var idi. Dəfələrlə Şücaətin Şamaxı rayonu Nağaraxana kəndindəki və Mədrəsə qəsəbəsindəki evlərində olmuşam. Onun səhhətində ciddi problemlər yarananda da ürəyində şuntlama əməliyyatı aparılmasına maddi cəhətdən köməklik edərək 10 min manat vermişəm», - Alışanov deyib.

Az.TV sədri ifadəsibndə bildirib ki, Şücaət Əkbərov 2016-cı ilin dekabrından Mədrəsə qəsəbəsində SSRİ vaxtında tikilmiş hansısa hovuzu göstərmək istədiyini və təsvir etdiyinə görə suvarma işlərində gələcəkdə problem olmaması üçün həmin su hovuzuna baxıb almalı olduqlarını ona deyib.

«Həmin vaxt Şücaətin bu təklifini normal qarşıladım. Hazırda isə anlayıram ki, Şücaət çölün düzündə olan sahəyə məni aparıb qətlə yetirmək istəyib. Lakin biz həmin yerə gedib baxa bilmədik. Bu hadisədən bir neçə gündən sonra biz Şamaxıya gedəndə polis əməkdaşlarının Şücaəti tutduqlarını bildik. Bundan sonra Bakıya qayıtdıq. Sonradan Şücaət Əkbərovun məni, bacım oğlu Dəyanət Cəfərovu bir neçə dəfə qətlə yetirmək istədiyi məlum oldu», - sədr ifadəsində bildirib.

Arif Alışanov bildirib ki, Şücaət Əkbərovun Şamaxı rayonu Mədrəsə qəsəbəsindəki evində olarkən heç kəsin əlində odlu silah görməyib, evdə olan şəxsləri Şücaət onlara usta kimi təqdim edib: «Lakin onlar ustaya oxşamırdılar».

Arif Alışanovu öldürməyə cəhddə, ona qarşı dələduzluq etməkdə və digər cinayətlərdə təqsirləndirilən Şücaət Əkbərov, Qoçalı Cəbiyev, Zöhrab Şirinov və Aqşin Hüseynovun cinayət işi üzrə məhkəmə iclası ötə n gün Bakı Ağır Cinayətlər Məhkəməsində başlayıb. Təqsirləndirilən şəxslər Cinayət Məcəlləsinin 29,120-ci (qəsdən adam öldürməyə cəhd), 178-ci (dələduzluq) və digər maddələrinə əsasən ittiham olunurlar. İş üzrə növbəti məhkəmə iclası martın 7-də olacaq.

İstintaq materiallarına əsasən təqsirləndirilən şəxslər Az.TV sədrinin həyatına bir neçə dəfə sui-qəsd cəhdi ediblər. Onun avtomobilini Ağsu aşırımında vurub dərəyə aşırmaq, bu da baş tutmadıqda Alışanovu gülləmək planları barədə istintaq materiallarında ətraflı bəhs edilir.