Ermənistanın sabiq baş naziri Qrant Baqratyan yenidən bəyan edib ki, Ermənistan nüvə silahına malikdir. Bunu o, Polşada keçirilən 27-ci beynəlxalq iqtisadi forum zamanı virtualaz.org-un müxbiri ilə söhbətində deyib.

Xatırladaq ki, Qrant Baqratyan əvvəllər də bir neçə dəfə Ermənistanda nüvə silahının mövcudluğunu bildirib. Siyasətçi bu barədə danışarkən deyirdi ki, Ermənistanda bu silah keçən əsrin 70-ci illərindən var. Baqratyan izah edirdi ki, Ermənistanda nüvə silahının mövcudluğu «Azərbaycan və Türkiyəni saxlayan faktor kimi» lazımdır.

Virtualaz.org-un əməkdaşı ilə söhbətində Q.Baqratyan, onun bəyanatlarının böyük hay-küy yaratmaq üçün səsləndirildiyi barədə iddiaları rədd edib və bir daha vurğulayıb ki, nüvə silahı Ermənistana sovet vaxtlarından qalıb.

«Bəli bizdə nüvə silahı var və mən bunu açıq deyirəm», - o əlavə edib.

Əməkdaşımızın «qorxmursunuzmu ki, belə bəyanatlardan sonra Ermənistanı sanksiyalar baxımından Şimali Koreyanın taleyi gözləyə bilər» sualının cavabında isə Baqratyan deyib: «Ermənistan özünü Azərbaycandan necəsə müdafiə etməlidir».

Qeyd edək ki, 1992-1995-ci illərdə Ermənistan Silahlı Qüvvələri Baş Qərargahının rəisi olmuş, 1993-cü ildə müdafiə naziri vəzifəsini icra etmiş general-leytenant Norat Ter-Qriqoryans əvvəllər Ermənistanın atom silahı almaq arzusu haqda açıq bəyan edirdi. Eyni zamanda, Ermənistanın yüksək vəzifəli digər şəxsləri də bir neçə dəfə hərbi arsenalda «çirkli bombaların» mövcudluğuna işarə etmişdilər.