Çaydan şorbaya, desertdən qəhvəyə qədər gündəlik həyatın bir çox sahəsində istifadə edilən darçınla bağlı diqqətçəkən xəbərdarlıq edilib. Eeni bir araşdırmaya görə, darçının əsas tərkib hissəsi olan sinnamaldehid bəzi dərmanların orqanizmdən xaric edilməsini sürətləndirərək onların effektivliyini azalda bilər.

“DailyMail”də yer alan xəbərə görə; ABŞ-da aparılan araşdırmada sinnamaldehidin qaraciyərdə dərmanları metabolizə edən müəyyən reseptorları aktivləşdirdiyi müəyyən edilib. Bu vəziyyət xüsusilə reseptli dərman istifadə edən şəxslər üçün risk yaradır. Tədqiqata rəhbərlik edən professor Şabana Xan, “Həddindən artıq darçın istehlakı dərmanların bədəndə daha qısa müddət qalmasına və beləliklə onların effektivliyini azalmasına səbəb ola bilər” dedi.

***

Gündəlik həyatda yulaf unu və ya isti içkilərdə az miqdarda istifadə edilən darçının heç bir problem yaratmadığı bildirilir. Bununla belə, darçın qabığından əldə edilən və yüksək miqdarda sinnamaldehid ehtiva edən əlavələrin xüsusilə müntəzəm dərman istifadə edənlər üçün risk yarada biləcəyi ifadə edilir.

***

Alimlər vurğulayırlar ki, darçın qan durulaşdıran maddələrlə qarşılıqlı təsir göstərə bilər ki, bu da qanaxma riskini artırır. İndi, bu qarşılıqlı əlaqənin daha geniş bir dərman qrupunu əhatə edə biləcəyinə dair tapıntılar var.

***

Darçın uzun müddətdir antioksidant tərkibi və ürək sağlamlığına verdiyi töhfə ilə qeyd olunur. Bəzi laboratoriya tədqiqatları hətta darçının “Alzheimer” xəstəliyini gücləndirən tau zülallarının meydana gəlməsinin qarşısını ala biləcəyini göstərir. Ancaq bu tapıntılar hələ klinik olaraq təsdiqlənməyib.

Xroniki xəstəlikləri olan şəxslərin xüsusilə diqqətli olması lazım olduğunu bildirən Xan, “Hipertoniya, şəkər, xərçəng, astma, depressiya kimi xəstəlikləri olanlar hər hansı əlavələrdən istifadə etməzdən əvvəl mütləq bir sağlamlıq mütəxəssisinə müraciət etməlidirlər”, – deyə xəbərdarlıq etdi.

***

Araşdırma qrupu həmçinin mətbəxlərdə istifadə edilən darçın növləri arasında ciddi fərqlərin olduğunu qeyd edib. Bazar rəflərində satılan bəzi darçın növlərinin tərkibində yüksək miqdarda kumarin olduğu və bunun qan durulaşdırıcı dərman istifadə edən insanlarda ciddi sağlamlıq problemlərinə səbəb ola biləcəyi bildirilir. Əksinə, antibakterial xüsusiyyətlərinə görə tez-tez istifadə edilən darçın yağının risksiz olduğu bildirildi.

Alimlər deyirlər ki, darçının orqanizmə necə təsir etdiyini daha yaxşı başa düşmək üçün əlavə tədqiqatlara ehtiyac var. Mütəxəssislərin fikrincə, əlavə olaraq istifadə edilən hər məhsul ziyansız ola bilməz və ciddi sağlamlıq nəticələrinə səbəb ola bilər.