Azərbaycan Respublikasının prezidenti İlham Əliyev Misir Ərəb Respublikasının yeni seçilmiş prezidenti Əbdülfəttah əs-Sisiyə təbrik məktubu yazıb.

Məktubda deyilir:

«Hörmətli cənab Prezident,

Misir Ərəb Respublikasının Prezidenti vəzifəsinə seçilməyiniz münasibətilə Sizi səmimi qəlbdən təbrik edir, dost Misir xalqının rifahı naminə qarşıdakı fəaliyyətinizdə uğurlar arzulayıram.

Azərbaycan Respublikası ilə Misir Ərəb Respublikasını, xalqlarımızı dərin tarixi kökləri olan ənənəvi dostluq və əməkdaşlıq münasibətləri birləşdirir. Ümidvaram ki, bu münasibətlər ölkələrimizin maraqlarına uyğun olaraq bundan sonra daha da möhkəmlənəcək və genişlənəcəkdir.

Sizə möhkəm cansağlığı, Misir Ərəb Respublikasına isə daim firavanlıq və tərəqqi diləyirəm».

***

İlham Əliyev digər məktubu portuqaliyalı həmkarına ünvanlayıb. Azərbaycan prezidenti Anibal Kavaku Silvanı ya göndərib ölkəsinin milli bayramı münasibəti ilə təbrik edib.

Dövlət başçısının təbrik məktubunda deyilir:
«Hörmətli cənab prezident, Milli bayramınız – Portuqaliya günü münasibətilə sizi və xalqınızı öz adımdan və Azərbaycan xalqı adından ürəkdən təbrik edirəm. Ümidvaram ki, Azərbaycan və Portuqaliya arasında əlaqələr, dostluq və əməkdaşlıq münasibətləri xalqlarımızın mənafelərinə uyğun olaraq bundan sonra da inkişaf edəcək və genişlənəcək. Belə bir xoş gündə Sizə möhkəm cansağlığı, işlərinizdə uğurlar, dost Portuqaliya xalqına daim əmin-amanlıq və rifah arzulayıram».