Yunus Əmrə Fondunda 400 milyon lirə məbləğində korrupsiya ilə bağlı ittiham olunan keçmiş rəhbər Şərəf Atəş Almaniyadan Türkiyəyə dönüb və saxlanılıb.

Yunus Əmrə Fondunun fəaliyyətində böyük miqdarda saxta faktura yolu ilə oğurluq etdiyi iddia edilən Şərəf Atəşin oğlu Enes Atəş daha əvvəl həbs edilmişdi.

Məlumata görə, korrupsiya ittihamlarından sonra xaricə çıxan Şərəf Atəşə “Ölkənə dön və ədalətin işini asanlaşdır” çağırışları göndərilmişdi. Bu çağırışlara cavab verən Şərəf Atəş geri dönüb. Onun geri dönüşündə barəsində 7 il azadlıqdan məhrumetmə cəzası istənməsi rol oynayıb.

Hazırlanan ittiham aktı ictimaiyyət tərəfindən kifayət qədər qaneedici hesab edilməyib. Hətta şikayətçi olsa da, Şərəf Atəşin həbsə getməyəcəyi proqnozlaşdırılır.

Yunus Əmrə Fondunun korrupsiya qalmaqalı, xüsusən fondun əməkdaşları arasında narazılıq yaradıb. Şərəf Atəşin saxlanılması xəbərindən sevinən fondda əməkdaşlara paxlava paylanıb.

İttiham aktında qeyd olunur ki, “Saxta fakturalarda göstərilən mal və xidmətlər həm ölkə daxilində, həm də xaricdə əslində alınmayıb, fonddan qarşılıqsız pul çıxarılaraq fonda ziyan vurulub”.