Bryus Uillisin həyat yoldaşı Emma Heminq demansla mübarizə aparan məşhur aktyorun qısa, amma dəyərli anlarda köhnə halını əks etdirdiyini bildirib.

Emma Heminq məşhur aktyorun səhhəti ilə bağlı emosional açıqlamalar verib. O, ərinin frontotemporal demans xəstəliyi səbəbindən dəyişdiyini, lakin zaman-zaman keçmişindən izlər daşıyan anların ona güc verdiyini deyib.

Emma Heminq açıqlamasında dilin yavaş-yavaş itirildiyini bildirib: “Bəzən gülür, bəzən gözlərində o köhnə parıltını və ya təbəssümü görürsünüz. Həmin an məni sehrləyir”, – deyib. Amma o da əlavə edib ki, bu anlar çox qısa davam edir: “Çətindir… amma minnətdaram. Həyat yoldaşım hələ də bir şəkildə bizimlədir, bunun üçün şükür edirəm”.

Uillis ailəsi 2022-ci ildə aktyorun səhhətindəki problemlər səbəbindən kino karyerasını bitirdiyini açıqlamışdı. İlk diaqnoz afaziya olmuş və bu halın onun idrak qabiliyyətlərinə təsir göstərdiyi bildirilmişdi. 2023-cü ildə isə daha dəqiq diaqnoz qoyuldu – frontotemporal demans. Bu xəstəlik beynin alın və gicgah nahiyələrindəki sinir hüceyrələrinin zamanla məhv olması ilə inkişaf edir.

2009-cu ildən evli olan Bryus Uillis və Emma Heminqin iki qızı var. Məşhur aktyorun Demi Mur ilə ilk evliliyindən isə Rumer, Skaut və Tallulah adlı üç yetkin qızı mövcuddur. Uillis və Mur ailələri xəstəlik prosesində bir-birinə sıx bağlı qalıblar.