Rusiya Müdafiə Nazirliyinin Suriyaya uçarkən bu gün səhər saatlarında Soçi yaxınlığında Qara dənizə düşən Tu-154 təyyarəsinin sərnişinləri arasında cəmi 8 hərbçi olub. Bunlardan biri MN-nin Aleksandrov adına hərbi xorunun bədii rəhbəri və dirijoru, general-leytenant Valeri Xəlilovdur, qalanların isə 5-i rütbəcə polkovnikdir, biri kapitan, biri mayordur.

Habelə sərnişinlər arasında iki Federal mülki vəzifəli şəxs - Badruutdinova və Qubankov yer alır.

«Ədalətli yardım» beynəlxalq humanitar təşkilatının rəhbəri, həkim-reanimatoloq, bugünlərdə prezident Putin tərəfindən mükafatlandırılan Doktor Lizanın (Yelizaveta Qlinka) da sərnişinlər arasında olduğu təsdiqlənib.

Əvvəlcədən xəbər verildiyi kimi sərnişinlərdən 9-u jurnalistlərdir, «1-ci Kanal»ın, NTV-nin və «Zvezda»nın əməkdaşlarıdır.

Virtualaz.org xəbər verir ki, Rusiya Müdafiə Nazirliyinin Aleksandrov adına hərbi xorunun 64 nəfərlik heyəti də təyyarədə olub və həlak olublar. 92 nəfərdən qalanları heyət üzvləridir.

***

11:50

Virtualaz.org xəbər verir ki, son məlumatlara görə Suriyaya uçarkən Qara dənizdə qəzaya uğrayan Rusiya təyyarəsində NTV telekanalının jurnalistləri də olub. Bunlar müxbir Mixail Lujetski, operator Oleq Pestov və səs operatoru Yevgeni Tolstovdur.

Life.ru təyyarənin qəzaya uğraması ərəfəsində aviadispetçerlə komandir arasında danışığın audioyazısını yayıb. Səs yazısına əsasən dispetçer təyyarə komandirinə uçuş marşrutu boyu hava şəraitini, küləyin sürətini və digər məlumatları çatdırır, lakin seansın sonunda təyyarə ilə əlaqə qəfildən kəsilir.

***

11:24

Virtualaz.org xəbər verir ki, Rusiya Müdafiə Nazirliyinin nümayəndəsi, general İqor Konaşenkov Suriyaya uçarkən qəzaya uğrayan təyyarənin göyərtəsində əvvəl açıqlandığı kimi 91 yox, 92 nəfərin ola biləcəyini deyib.

Life.ru artıq sərnişinlərin və heyət üzvlərinin siyahısını yayıb. Siyahıya əsasən sərnişinlər arasında bundan əvvəl açıqladığı kimi Rusiya Müdafiə Nazirliyinin hərbi polisinin rəisi, general-leytenant Vladimir İvanosvkinin olduğu təsdiqlənmir. Lakin Rusiya Müdafiə Nazirliyinin Aleksandrov adına hərbi xorunun bədii rəhbəri, general Xəlilovun sərnişinlər arasında olduğu siyahı ilə təsdiqlənib.

Rusiya Müdafiə Nazirliyinin nümayəndəsi, general İqor Konaşenkov bildirib ki,  xilasedicilər təyyarənin sərnişinlərindən birinin cəsədini aşkar ediblər. Cəsəd sahildən 6 km məsafədə tapılıb və gəminin göyərtəsinə qaldırılıb. KİV-lər daha bir neçə cəsədin tapıldığını xəbər verir.

***

11:14

Virtualaz.org xəbər verir ki, Rusiya Müdafiə Nazirliyinə aid olan və bu gün səhər saatlarında Soçidən havaya qalxdıqdan sonra Qara dənizə düşən Tu-154 təyyarəsi 33 il əvvəl-1983-cü ildə istehsal olunub və istismara verilib.

Təyyarənin Moskva ətrafındakı Çkalovsk hərbi aerodromundan havaya qalxdıqdan sonra Mozdokda yanacaq götürmək üçün enməsi nəzərdə tutulmuşdu. Lakin Şimali Qafqazda hava şəraiti əlverişsiz olduğundan təyyarənin Soçidə yanacaq götürməsi qərara alınıb.

Soçidəki istirahət bazalarından birindən şahidlər deyiblər ki, Tu-154-ün qəzaya uğraması anında onlar təyyarə mühərriklərinin yüksəkdən səsini eşidiblər. Lakin təyyarənin düşdüyü anı görməyiblər.

Digər informasiyaya görə təyyarənin sərnişinləri arasında daha bir general olub. Bu, Rusiya Müdafiə Nazirliyinin Aleksandrov adına hərbi xorunun bədii rəhbəri, general-leytenant Valeri Mixayloviç Xəlilovdur.

***

11:00

Virtualaz.org Rusiya KİV-lərinə istinadən xəbər verir ki, Müdafiə Nazirliyindəki mənbə həkim-xeyriyyəçi Doktor Lizanın (Yelizaveta Qlinka) həqiqətən Suriyaya uçan heyətin tərkibində olduğunu təsdiqləyib. Lakin bildirib ki, Doktor Liza uçuşqabağı nəzarətdən keçəndən sonra onun adını sərnişinlərin siyahısından çıxarıblar.

Digər məlumata görə təyyarənin sərnişinləri arasında Rusiya Müdafiə Nazirliyinin hərbi polisinin rəhbəri, general-leytenant Vladimir İvanosvki də olub. Bu, Suriyaya görə həyatını qurban verən ən yüksək rütbəli Rusiya zabiti hesab oluna bilər.

Xatırladaq ki, ötən həftə Rusiya Müdafiə Nazirliyi yaraqlılardan təmizlənmiş Hələb şəhərinə hərbi polis batalyonu yeridib. General İvanosvki Sankt-Peterburqdandır, Putinin yerlisidir, bundan əvvəl Müdafiə Nazirliyinin maddi-texniki təchizat idarəsinə rəhbərlik edib.

***

10:46

«1-ci Kanal» bildirir ki, Qara dənizdə qəzaya uğrayan Tu-154 təyyarəsində kanalın çəkiliş qrupu-müxbir Runkov, operator Denisov və səs operatoru Soydov olublar. «Zvezda» telekanalı isə təyyarədə üç nəfərlik çəkiliş qrupunun olduğunu təsdiqləyib, ancaq əlavə məlumat verməyib.

KİV-lər xəbər verir ki, təyyarədə Doktor Liza kimi tanınan məşhur həkim Yelizaveta Qlinka da var. Lakin Qlinkanın nümayəndəsi bu haqda məlumata malik olmadığını bildirir.

***

10:38

Rusiya Fövqəladə Hallar Nazirliyinin Cənub regional mərkəzinin bildirdiyinə görə, Qara dənizdə sahildən 1.5 kilometr aralıda təyyarənin şassisinin dayağı tapılıb. Bu detal dənizin 50-70 metr dərinliyindədir. Sahildən 5.5 km məsafədə isə yağ ləkələri aşkar olunub. Bu əlamətlər təyyarənin əvvəl təxmin edildiyi kimi Krasnodar vilayətinin dağlıq ərazisində deyil, dənizə düşdüyünü göstərir.

Virtualaz.org qeyd edir ki, Tu-154 təyyarəsinin qəzaya uğramasını Rusiyanın Suriya əməliyyatlarında daha bir ciddi itkisi hesab etmək olar.Ötən il İŞİD Rusiyadan qisas almaq üçün Misirin Şarm əl-Şeyx şəhərindən Moskvaya uçan sərnişin təyyarəsini partlatmışdı. Bu dəfə isə belə görünür ki, Rusiya Müdafiə Nazirliyinin Tu-154 təyyarəsi ya texniki nasazlıq, ya pilot səhvi üzündən qəzaya uğrayaraq Suriyaya görə itkilərin artmasına səbəb olub. Tu-154 təyyarəsi dünyada ən çox qəzaya uğrayan və ən təhlükəli sərnişin təyyarəsi hesab olunur. Bu təyyarələrin istismarı bir çox ölkələrdə qadağan olunub.

***

10:29

Virtualaz.org xəbər verir ki, Rusiya Müdafiə Nazirliyinə aid Tu-154 təyyarəsinin qəzaya uğradığı rayona Mi-8 vertolyotu göndərilib. Soçidə Ka-32, Gelencikdə isə daha bir Mi-8 vertolyotu hazır vəziyyətə gətirilib.

Qara dənizdə isə təyyarənin axtarışlarına 7 gəmi cəlb olunub. Təyyarənin yerli vaxtla saat 05.30-da havaya qalxdığı və 20 dəqiqə sonra radarlardan itdiyi bildirilir. Rusiyanın müdafiə naziri Sergey Şoyqu axtarış-xilasetmə əməliyyatlarını videokonfrans vasitəsilə silahlı qüvvələrin rəhbərliyi ilə koordinasiya edir. Təyyarənin axtarışlarına Cənub hərbi dairəsinin bütün xilasedici dəstələri cəlb olunub.

Göyərtədə cəmi 91 nəfərin, o cümlədən səkkiz ekipaj üzvünün olduğu bildirilir. Təyyarənin sərnişinləri arasında cəmi 9 jurnalist, habelə  Aleksandr adına mahnı və rəqs ansamblının musuqiçiləri də olub. Onlar Rusiyanın Suriyadakı Hmeymim aviabazasında dislokasiya olunmuş hərbçiləri Yeni il münasibətilə təbrik etmək üçün gedirmiş. İlkin məlumata görə təyyarənin qəzaya uğramasına texniki nasazlıq və ya pilot səhvi səbəb ola bilərdi. Son məlumata görə təyyarənin qalıqları Qara dənizdə aşkar edilib.