“Çelsi”nin keçmiş sahibi Roman Abramoviç peşəkar futbolla bütün əlaqələrini kəsdiyini açıqlayıb. Britaniya hökuməti “Çelsi”nin satışından əldə olunan 2,5 milyard funt-sterlinqin Ukraynaya köçürülməsi üçün təzyiqləri artırır.

Rusiyalı milyarder Roman Abramoviç peşəkar futbolla bağlı bütün rollarından istefa verdiyini və bundan sonra heç bir klubda işləmək fikrində olmadığını açıqlayıb.

“The Daily Mail”in məlumatına görə Abramoviçin açıqlamaları “Sanctioned: The Inside Story of the Sale of Chelsea FC”, – adlı kitabın bir fəslində yer alıb.

Abramoviç kitabın müəllifi Nik Purevala, “Klub mülkiyyəti və ya hər hansı bir peşəkar rol... Mən artıq o dəftəri bağladım”, – deyib.

Buna baxmayaraq, Abramoviç gələcəkdə “Chelsea” matçına gedərək klubla normal vidalaşmaq istədiyini deyib.

***

Futbola qayıtmayacağını açıq şəkildə bildirən Abramoviç istisna hal kimi imkansız gənclərə dəstək olacaq layihələrə töhfə verəcəyini bildirib.

Abramoviç, “Əgər mənalı bir fürsət olarsa, gənclərə kömək etmək istərdim”, – deyib.

2022-ci ildə Ukraynada müharibənin şiddətlənməsindən sonra Britaniya hökuməti Abramoviçə Kremllə yaxın əlaqələri olduğunu əsas gətirərək ona qarşı sanksiyalar tətbiq edib.

Bu proses zamanı “Çelsi” Futbol Klubunun satışı təsdiqlənib və klub 2,5 milyard funt-sterlinq qarşılığında ABŞ mərkəzli konsorsiuma verilib.

Lakin satışdan əldə olunan gəlir Abramoviçin razılığı olmadan istifadə edilə bilməz. Pul hələ də İngiltərədəki hesabda dondurulur.

***

Keçən həftə Böyük Britaniyanın maliyyə naziri Reyçel Rivs və xarici işlər naziri Devid Lammi birgə bəyanat yayaraq Abramoviçə çağırış ediblər.

Bəyanatda deyilir ki, “Çelsi”nin satışından əldə olunan gəlir Ukraynaya humanitar yardım üçün istifadə edilməlidir. Hökumət Abramoviçin razılıq vermədiyi təqdirdə qanuni addım ata biləcəklərini bəyan edib.

Abramoviç isə iddia edir ki, satışdan əldə olunan vəsait təkcə Ukrayna üçün deyil, müharibənin qurbanı olan bütün insanlar (həm Ukrayna, həm də Rusiya tərəfindəki mülki şəxslər) üçün istifadə edilməlidir.

“The Guardian” yazır ki, Abramoviçin hüquq komandası ilə intensiv danışıqlara baxmayaraq, məsələ ilə bağlı “fundamental fikir ayrılığı” həll olunamayıb.

Kremllə hər hansı bir əlaqəsini inkar edən Abramoviç əvvəllər Moskva ilə Kiyev arasında vasitəçilik edən azsaylı adlardan biri olub.