NATO tapşırığı çərçivəsində Estoniyada yerləşən italyan qırıcıları, ilk dəfə rus təyyarələri ilə qarşılaşaraq gerioturtma əməliyyatı həyata keçirib.

NATO-nun Hava Patrul xidməti tapşırığı çərçivəsində 13 avqustda Estoniyanın Amari Hava Bazısından havaya qalxan İtaliya Hərbi Hava Qüvvələrinə məxsus iki “F-35 Lightning” II qırıcı təyyarəsi, Alyansın hava məkanına yaxın bölgədə uçan rus təyyarələrinin qarşısını kəsib. Bu, italyan beşinci nəsil döyüş təyyarələrinin Baltik regionunda ilk əməliyyatı olub.

NATO-ya görə, uçuş planı və aktiv transponderləri olmadan uçan rus təyyarələrinin bu cür fəaliyyəti, adətən kəşfiyyat və NATO-nun reaksiya müddətini ölçməyə yönəlir. Həmin gün qarşısı alınan təyyarələr “Su-24” (aşağı hündürlükdə hücum və dəqiq zərbə təyyarəsi) və “Su-27” (uzaqmənzilli hava üstünlüyü qırıcı təyyarəsi) olub.

İtalyan “F-35”ləri, 32-ci Eskadrona bağlı olaraq NATO-nun Sürətli Reaksiya (Quick Reaction Alert) şəbəkəsinə inkişaf etmiş gizlilik (stealth), radar və sensor imkanları qazandırır. Bu sayədə potensial təhdidlər daha erkən aşkarlanıb izlənilə bilir. Tapşırıq həm taktiki üstünlük, həm də rus hava fəaliyyətləri barədə kəşfiyyat məlumatı təmin edib.

Baltik regionundakı bu hərəkətlilik, son dövrdə Rusiyanın hərbi uçuşları artdığını göstərir. Bundan əvvəl, iyul 22-də, NORAD Alyaska Hava Hücumundan Müdafiə Tanıma Zonasında Rusiyaya məxsus “Tu-95MS” strateji bombardmançı təyyarələrinin və onları müşayiət edən “Su-35S” və “Su-30SM” qırıcılarının qarşısı alınmışdı. ABŞ-a məxsus “F-35” və “F-16” təyyarələri 15 saat davam edən bu uçuşu beynəlxalq hava məkanında izləyib.