Tələbə Qəbulu üzrə Dövlət Komissiyası (TQDK) ümumi orta təhsil bazasında (9 illik) kolleclərə qəbul olmaq istəyən abituriyentlərə müraciət edib.

Komissiyanın mətbuat xidmətindən AzVision.az-a verilən məlumatda bildirilir ki, 9-cu sinfi bu il bitirən şagirdlər üçün ümumi orta təhsil bazasında (9 illik) orta ixtisas təhsili müəssisələrinə qəbul buraxılış imtahanlarının nəticələri əsasında aparılacaq və bu məzunlar kolleclərə əlavə imtahan verməyəcəklər.

Bildirilib ki, 9 illik bazada kolleclərə qəbul olmaq istəyən əvvəlki illərin məzunu olan gənclərin imtahan mərkəzləri üzrə bölgüsünü təşkil etmək və digər çoxsaylı hazırlıq işləri ilə əlaqədar olaraq ərizələrinin qəbulu 13 iyun tarixində başa çatıb.

Ümumi orta təhsil müəssisələrinin 9-cu sinfini 2014-cü ildə bitirən şagirdlər üçün isə ərizə qəbulunun son müddəti 30 iyun saat 23:59 müəyyən olunub.

Qeyd edək ki, həmin gənclər ərizələrini Sənəd Qəbulu Komissiyasına (SQK) müraciət etmədən internetlə özləri təsdiq edə bilərlər.

Məlumat üçün bildirək ki, istər 9-cu sinfi bu il bitirən, istərsə də əvvəlki illərin məzunları üçün hər bir fənn üzrə abituriyentin balları hesablandıqda hər düzgün cavab 1 balla qiymətləndirilir. Abituriyentin ümumi balı hər bir fənn üzrə topladığı balların cəmi əsasında müəyyənləşir və toplanıla bilən maksimal bal 60-a bərabər olur.

İxtisas seçimi iyulun 2-dən 10-dək həyata keçiriləcək. İxtisas seçiminə ümumi balı 16-dan və hər bir fənn üzrə balı 8-dən az olmayan abituriyentlər buraxılır. Hər bir abituriyent müxtəlif təhsil müəssisələrinin təhsili dövlət hesabına və ödənişli əsaslarla olan 12-dək ixtisas kodunu seçə bilər.

Daha ətraflı məlumatlar 3 saylı «Abituriyent» jurnalında dərc olunub.

Qeyd: Əvvəlki illərin məzunları üçün isə 9 illik bazada kolleclərə qəbul imtahanı iyunun 29-da keçiriləcək. İmtahanda iştirak etmək istəyən və müəyyən olunmuş vaxta kimi elektron ərizələrinin təsdiqini təmin abituriyentlər «İmtahana buraxılış vərəqi»ni imtahandan bir neçə gün əvvəl internet saytımızdan çap edə biləcəklər və bu haqda öncədən səhifəmizdə məlumat veriləcək.