FİFA Norveç milli komandasının futbolçusu Ule Selnesi ağır cəzalandırıb. «Report»un məlumatına görə, buna səbəb 22 yaşlı yarımmüdafiəçinin 2018-ci il dünya çempionatının seçmə mərhələsində Azərbaycan yığmasına Bakı Olimpiya Stadionunda 0:1 hesabı ilə uduzduqları oyundan sonra hakimlərin ünvanına təhqiramiz ifadələr işlətməsi olub. Nəticədə «Sent-Etyen»in 22 yaşlı yarımmüdafiəçi 11 ay müddətinə millidən kənarlaşdırılıb. Qərara əsasən o, bu müddətdə Norveç millisi ilə rəsmi oyunlarda iştirak edə bilməyəcək.

Selnes meydançanı tərk edərək paltardəyişmə otağına getdiyi zaman tuneldə yan xətt hakiminə çox pis idarəçilik etdiklərini söylədiyini bildirib: «Mən yalnız bunu dedim. Həmin vaxt tuneldə çox səs-küy vardı. Azərbaycanlılar - assosiasiya nümayəndələri, oyunçular, stadion işçiləri qələbəni bayram edirdilər. Söylədiklərimə görə təəssüf edirəm. Mənimlə pis davrandılar. Buna baxmayaraq, qərara görə çox məyusam. Hesab edirəm ki, bu, ədalətsizdir».

Norveç Futbol Federasiyası da qərarla razı olmayaraq apellyasiya vermək variantını nəzərdən keçirir. Qurum qərarı sərt saymaqla yanaşı, futbolçunun yan xətt hakiminə söylədiklərinə görə üzrxahlıq edir.

Qeyd edək ki, matçı Liran Lianinin başçılıq etdiyi israilli hakimlər briqadası idarə edib. Azərbaycan - Norveç oyunu millimizin 1:0 hesablı qələbəsi ilə başa çatıb.

Xatırladaq ki, Selnes «Sent-Etyen»in heyətində Avropa Liqasının qrupunda «Qəbələ» ilə ev matçında iştirak edib.