Rusiya məhkəməsi “Wall Street Journal”ın (WSJ) müxbiri, ABŞ vətəndaşı Evan Qerşkoviçi casusluq ittihamı ilə 16 il müddətinə azadlıqdan məhrum edib. Məhkəmənin mətbuat xidmətindən verilən açıqlamada Qerşkoviçin təqsirini etiraf etmədiyi bildirilib.

Qerşkoviç barəsində Yekaterinburq şəhərinin Sverdlovsk vilayət məhkəməsində dünən başlayan məhkəmə iclasında hökm elan edilib.

“WSJ” qəzetinin Moskva ofisinin müxbiri 2023-cü il martın 29-da Rusiya Federasiyasının Ural vilayətinin Yekaterinburq şəhərində saxlanılıb.

Rusiya Federal Təhlükəsizlik Xidməti (FTB) ABŞ vətəndaşı Qerşkoviçin “Amerika hökumətinə casusluq” ittihamı ilə həbs edildiyini bildirib. Qerşkoviç Rusiya Xarici İşlər Nazirliyi tərəfindən akkreditasiya olunub.

ABŞ prezidenti Co Bayden və bəzi yüksək vəzifəli rəsmilər amerikalı jurnalistin dərhal azad edilməsinə çağırıblar.

Rusiya Xarici İşlər Nazirliyinin sözçüsü Mariya Zaxarova bildirib ki, Qerşkoviçin Yekaterinburqdakı fəaliyyətinin “jurnalistika ilə heç bir əlaqəsi yoxdur”.

Məhkəmə prosesi bir ildən artıq idi ki, davam edirdi.