Urmiyadakı son hadisələr fonunda, Azərbaycanın güneyində türk milli şüurunun özünü ən güclü şəkildə büruzə verməsi bizi həm duyğulandırır, həm də həyəcanlandırır.

Nəzərə almaq lazımdır ki, İranda yaşayan türklərin kimlik duyğuları, ictimai-siyasi baxışları və sosial vəziyyətləri heç də “ağ-qara” deyil. Məzhəb bağlılığını etnik mənsubiyyətindən üstün tutanlar, İran kimliyini ön planda saxlayanlar, mövcud dini rejim ilə siyasi-iqtisadi mənfəət əlaqəsində olanlar bəlkə də çoxluq təşkil edir. Bununla belə, Yeni Yaxın Şərqin formalaşdığı, İran ətrafında ciddi proseslərin cərəyan etdiyi və kürdlərin milli dövlət üçün aktivləşdiyi bir vaxtda Güney Azərbaycan türklərinin siyasi canlılıq göstərməsi olduqca vacibdir.

Urmiyadakı nümayişlər sübut edir ki, İran dini rejiminin əks-təbliğatına baxmayaraq, həqiqətən də Azərbaycanın güneyində milli şüuru dərk edən passionar qüvvələr var. Ümid edirəm ki, tarixi şərtlər yetişsə, yəni “İranın Yuqoslaviyalaşması” ssenarisi aktuallaşsa, bu qüvvələr Güney Azərbaycan türklərinin də öz müqəddəratını təyin etməsində rol oynayacaqlar.