2024-cü ildə ölkə üzrə təxminən 90.000 oğurluq hadisəsi qeydə alınıb. Bu məlumatı ZDF-yə Almaniya Sığorta Şirkətləri Assosiasiyası (GDV) təsdiqləyib. Bu statistika hər altı dəqiqədən bir ev və ya mənzil oğurlandığı mənasına gəlir.

GDV-nin açıqlamasına görə, oğurluqların sayı 2023-cü ilə nisbətən dəyişməyib. Bununla belə, maddi ziyan xeyli artıb. Sığorta şirkətləri 2023-cü ildə cəmi 330 milyon avro təzminat ödədiyi halda, 2024-cü ildə bu rəqəm 350 milyon avroya yüksəlib. Bu artımda ən böyük amilin oğruların hədəf olaraq bahalı elektron məhsulları seçdiyi bildirilir.

“Oğrular asanlıqla nağd pula çevrilə bilən əşyaları götürürlər. Bu gün bunlar çox vaxt smartfonlar, kameralar və kompüterlər kimi yüksək texnologiyalı cihazlardır”, – GDV-nin vitse-prezidenti Anya Kefer-Rorbax bildirib. Bu tendensiya həm də hər hadisəyə görə orta zərərin artmasına səbəb olub. Dəyən ziyan 2023-cü ildə 3600 avro idisə, 2024-cü ildə 3800 avroya çatıb. Bu, altı faiz artım deməkdir.

GDV artan ziyan qarşısında vətəndaşları evlərini daha yaxşı qorumağa çağırıb: “Giriş qapısındakı keyfiyyətli kilidləmə sistemi, məsələn, üfüqi sürgü kilidi oğurluğun qarşısını almaqda əhəmiyyətli fərq yarada bilər”.

Bundan əlavə, pəncərə qıfılları, siqnalizasiya sistemləri və hərəkət sensorları ilə xarici işıqlandırmanın da oğrulardan çəkindirici olduğu bildirilir.

Koronavirus pandemiyası zamanı oğurluqlarda ciddi azalma müşahidə olunub. 2020-ci ildə 80.000, 2021-ci ildə isə 70.000 oğurluq hadisəsi qeydə alınıb. Lakin bu rəqəmlər yenidən artmaqdadır. Müqayisə üçün qeyd edək ki, 2015-ci ildə sığortalı evlərdə oğurluq hadisələrinin sayı 180 min ədəd olub.