Məşhur aktyorlar Robert De Niro və Leonardo Di Kapriodan tutmuş rejissor Kventin Tarantinoya qədər kino dünyasının bir çox mühüm adını bir araya gətirən 78-ci Kann Film Festivalı dünən işinə başlayıb.

Hər il bu vaxta yaxın dünyanın ən görkəmli və tanınmış aktyorları, kinorejissorları, ssenaristləri və kino dünyasının aparıcı simaları film sənayesinin ən nüfuzlu illik tədbirlərindən birinə qatılmaq üçün Fransanın cənub-şərqindəki Riviera kurort Kanna axışırlar.

Növbəti 12 gün ərzində festivalda Tom Kruzun “Mümkünsüz Missiya – Son Hesablaşma”, Spike Linin “Cənnət və cəhənnəm” (“Highest 2 Lowest”) və Ari Asterin “Eddington” filmləri də daxil olmaqla əsas premyeralar keçiriləcək.

Hollivudun bir çox super ulduzları da festivalda iştirak edir. Açılış mərasimi üçün qırmızı xalça üzərinə çıxan ulduzlardan bəziləri Robert De Niro, Kventin Tarantino, Jülyet Binoş idi.

Mərasimə qatılan Leonardo Di Kaprio qırmızı xalçadan keçməsə də, Robert De Niroya fəxri “Qızıl Palma budağı” mükafatını təqdim edərkən ayaqda alqışlarla qarşılanıb. İkili 1993-cü ildən başlayaraq üç dəfə böyük ekranı paylaşıblar.

Di Kaprio və De Niro ilk dəfə Maykl Katon-Consun “Bu oğlanın həyatı” filmində birlikdə çalışıblar. Bir neçə il sonra, 1996-cı ildə onlar yenidən Cerri Zaksın “Marvinin otağı” filmində əməkdaşlıq etdilər. 2023-cü ildə Martin Skorsezenin (“Bütöv Ay Qatilləri”) “Killers of Flower Moon” filmi üçün yenidən bir araya gələn ikilinin ekranı yenidən paylaşması 30 ilə yaxındır.

***

Di Kaprio De Nironu “arxetipik aktyor” kimi tərifləyib və ABŞ prezidenti Donald Trampın qatı tənqidçisi olan 81 yaşlı aktyoru “demokratiya naminə” apardığı mübarizəni təqdir edib.

Di Kaprio ona “Qızıl Palma budağı”nı təqdim edərkən tamaşaçılar De Nironu uzun sürən alqışlarla qarşılayıblar və De Niro ona “Sağ ol, bala” deyə cavab verib.

Festivala görə təşəkkürünü bildirdikdən sonra De Niro bu yaxınlarda ABŞ hüdudlarından kənarda istehsal olunan filmlərə rüsum tətbiq etmək niyyətini açıqlayan Trampa müraciət edib.

De Niro çıxışında “İncəsənət realdır. İncəsənət müxtəlifliyi əhatə edir. Buna görə də incəsənət dünyanın avtokratları və faşistləri üçün təhlükədir”, – deyib.

“Amerikanın cahil prezidenti özünü ölkənin aparıcı mədəniyyət qurumlarından birinə rəhbər təyin etdi. İncəsənət, humanitar elmlər və təhsilə ayrılan maliyyəni və dəstəyi kəsdi. İndi o, ABŞ-dan kənarda çəkilən filmlərə 100 faiz tarif elan etdi. Yaradıcılığı alıb-sata bilməzsən”.

***

Amelie Bonninin fransız romantik filmi “Bir gün buraxın”ın ilk nümayişindən əvvəl baş tutan açılış mərasiminə dramatik bir giriş edən Tarantino səhnəni teatral formada tərk etməzdən əvvəl festivalı rəsmi olaraq açıq elan etdi.

Tarantino dünən Qərb kinorejissoru Corc Şermanı mükafatlandırıb. Mərasimdə “Anora” filminin rejissoru və keçən ilki “Qızıl Palma budağı”nın sahibi Şon Beyker də iştirak edib.

Mərasim Kannda gərgin bir günə yekun vurdu, burada Ukraynaya üç filmdən ibarət ehtiram və Çarli Çaplinin 100 illik yubileyi çərçivəsində “Qızıl qaçış” filminin bərpa olunmuş versiyasının premyerası keçirilib.

Kannın açılışı 2021-ci ildə Fransanın ən tanınmış aktyorlarından biri olan Jerar Depardyenin film çəkilişlərində iki qadına qarşı cinsi qısnamaya görə məhkum edilməsi ilə eyni vaxta təsadüf edib.

Fransada məşhur #MeToo davasında Depardye 18 aylıq şərti həbs cəzası alıb. 76 yaşlı aktyor uzun illərdir Kann Film Festivalında tanış simadır.

Builki festival üçün Qızıl Palma budağına qərar vermək üçün Jülyet Binoşun sədrliyi ilə münsiflər heyəti formalaşdırılıb.

Digər üzvlərə Halle Berri, Ceremi Stronq, Hong Sanq-su, Alba Rohrvaçer, Dieudo Hamadi, Payal Kapadia, Leyla Slimani və Carlos Reyqadas daxildir.

Mayın 24-də veriləcək Kannın ən yüksək mükafatı olan “Qızıl Palma budağı” uğrunda 22 film mübarizə aparacaq. Bu filmlərə Ues Andersonun “The Finikian Scheme”, Riçard Linkleyterin “Nouvelle Vague”, Linn Ramzeyin “Die”, “My Love”, Yoahim Trayerin “Sentimental Remint”, Hermanusun “Səsin tarixi”, Culiya Dyukurnaunun “Alfa” və Cəfər Pənahinin “Sadə qəza”  filmləri daxildir.

Münsiflər heyəti 22 filmin hamısına baxacaq və mayın 24-də təqdim olunacaq nüfuzlu mükafatın qalibini müəyyənləşdirəcək.