Afrika ölkəsi Kap-Verdenin bir hotel barında baş verən hadisə “EasyJet” sərnişinlərini təəccübləndirib. İddiaya görə, Britaniya hava yolu şirkətinin pilotu çılpaq və sərxoş vəziyyətdə olub. Hadisədən sonra pilot işindən uzaqlaşdırılıb.

Britaniyanın “The Sun” qəzetinin xəbərinə görə, bəzi sərnişinlər səhərin erkən saatlarında hoteldə pilotu tanıyaraq vəziyyəti “EasyJet”ə bildiriblər. Söhbət gedən kapitan pilot təxminən 36 saat sonra sərnişinləri Londona aparmalı idi. Şirkət isə həmin uçuşu həyata keçirmək üçün başqa bir kapitan təyin edib.

“EasyJet” “Deutsche Presse-Agentur”a açıqlamasında, “Hadisədən xəbərdar olduğumuz andan etibarən, prosedurlarımıza uyğun olaraq, araşdırma tamamlanana qədər pilot vəzifəsindən kənarlaşdırılıb”, – deyə bildirib. Şirkət sərnişin və heyətin təhlükəsizliyinin hər zaman ən yüksək prioritet olduğunu vurğulayıb.

Hadisənin ötən həftə baş verdiyi bildirilib. Kap-Verde, Qərbi Afrika sahilləri açığında, Atlantik okeanında yerləşən on adadan ibarətdir. Londondan ora uçuş müddəti təxminən altı saatdır.