Ərdəbil əyalətində yerləşən «Heyran gədiyi»nin bu əyalətdən ayırıb Gilan vilayətinə ilhaq edilməsi məsələsi yenidən gündəmə gəlib. Bu barədə Astara Şəhər İcra Hakimiyyəti başçısı Yunis Rənckeş mətbuata məlumat verib.

«Gilan əyalətinin giriş darvazası «Heyran gədiyi» məntəqəsində inşa ediləcək. Ətraf Mühit, Təbii Qaynaqlar və Mədəni İrs Təşkilatlarının rəisləri ilə bölgəyə baxış keçirdiyimiz zaman, darvazanın inşa ediləcəyi yeri də müəyyənləşdirdik. Hazırda bu barədə səlahiyyətli orqanlarla məsləhətləşmələr gedir.

Gilan əyalətinin giriş darvazası layihəsi «Heyran gədiyi»ndə tuneldən sonra icra olunacaq. Bu layihə Astara Turizm və Planlaşdırma Komitəsi tərəfindən də təsdiqlənib. Hazırda layihəsinin icrası məsələsinə baxılır. Mövzu ilə bağlı ekspertlərin fikrindən də istifadə olunacaq», - deyə o bildirib.

İcra Hakimiyyəti başçısı vurğulayıb ki, «inşa ediləcək darvaza Gilan əyalətini tanıtdırmaqda, bölgədə turizm sahəsini inkişaf etdirməkdə böyük rol oynayacaq. Bu layihə həyata keçirildikdən sonra Gilan əyalətinə daha çox turist cəlb olunacaq».

Sərhədyanı Astara şəhəri Gilan əyalətinin mərkəzi olan Rəşt şəhərinin 220, Ərdəbilin isə 79 kilometrliyində yerləşir. Bu şəhər vaxtı ilə Ərdəbil şəhəri və Şərqi Azərbaycan Əyalətinə bağlı olub. Sonralar ölkənin inzibati ərazi bölgüsündə müvəqqəti olaraq Gilan əyalətinə ilhaq edilib. Şəhərin əhalisi Azərbaycan türkləridir, onlar bütün azərbaycanlılar kimi, Astaranın Ərdəbil əyalətinə ilhaq edilməsini tələb edirlər.