vaxtlı-vaxtında oxuyun! Şənbə, 1 oktyabr 2022
1 ABŞ dolları 1 USD = 1.7 AZN
1 Avro 1 EUR = 1.928 AZN
1 Rusiya rublu 1 RUB = 0.0258 AZN
1 İngiltərə funt sterlinqi 1 GBP = 2.2014 AZN
1 Türkiyə lirəsi 1 TRY = 0.3228 AZN
Mustafa Kamal Atatürk (1881 - 1938)

«Uca Türk, sənin üçün yüksəkliyin hüdudu yoxdur»

Mustafa Kamal Atatürk (1881 - 1938)
GÜNEY  
13:14 | 22 sentyabr 2022 | Cümə axşamı Məqaləyə 1279 dəfə baxılıb Şriftin ölçüsü Xəbərin şriftini kiçilt Xəbərin şriftini böyüt

“Şahçıların planı yerlə-yeksan oldu”

Əhməd Obalı: “Güney Azərbaycan Milli Hərəkatının de-fakto rəhbəri Abbas Lisanidir”

MÖVZU İLƏ ƏLAQƏLİ

​​​​​​​İranda hicab qadağalarının qurbanı 22 yaşlı Məhsa Əmininin öldürülməsinə etiraz olaraq başlayan aksiyalar davam edir. Etiraz aksiyaları artıq Güney Azərbaycan şəhərlərinə yayılıb. Küçələrə çıxan narazı insanlar islam inqilabı liderlərinin, dövlət rəhbərlərinin portretlərini yandırıb.

Güney Azərbaycan Televiziyasının qurucusu və rəhbəri Əhməd Obalı baş verən hadisələrə münasibət bildirib.

Əhməd Obalı bildirib ki, əvvəlki aksiyalardan fərqli olaraq artıq 5-ci gündür ki, narazılıq davam edir.

“Tehran, İsfahan, Kirman, Şiraz şəhərlərində izdihamlı aksiyalar baş tutub.  Güney Azərbaycan şəhərlərində Təbriz, Ərdəbil, Urmiyada, kiçik şəhərlərdə etiraz eyləmləri keçirilir. Məhsa Əmini məsələsindən öncə ictimai rəyi öyrənilmişdi.

Ölkə əhalisinin 70 faizi etiraz aksiyalarına çıxmağa hazır olduğunu bildirmişdi. Məhsa Əmini əxlaq polisi tərəfindən öldürüldükdən sonra bu narazılıq çılpaqlığı ilə ortaya çıxdı”, – deyə, Əhməd Obalı bildirib.

Son zamanlar xaricdə fəaliyyət göstərən İran müxalifləri fəallaşıb. Özəlliklə 1979-cu ildə devrilmiş şahın oğlu Rza Pəhləvi ölkə əhalisinə müraciət edib, aksiyaları davam etdirməyə çağırıb. Onların planı nədir?

Əhməd Obalı bildirib ki, şahçıların İranda baş verən hadisələrlə bağlı planı başa tutmayıb: “Özəlliklə şahçıların planı yerlə-yeksan oldu, tutmadı. Hadisələr başlanan gün-bazar günü şahın Amerikada yaşayan oğlu bəyanat verdi.

Dedi ki, ay millət, gedin, Məhsa Əminiyə evdə yas tutun, əzadarlıq edin. Kürd təşkilatları dedi ki, işə getməyin, tətil edin. Amma xalq onların sözünə əməl etmədi. Əksinə şahçılara qarşı daha aqressiv yazılar yazıldı ki, milləti üsyana çağırmaqdansa, deyirsiz gedin, əzadarlıq edin.

Əzadarlıq nədir, Ərbəin yürüşü deyil ki?”

Günaz.TV-nin rəhbəri bildirib ki, Güney Azərbaycan milli təşkilatlarının baş verən hadisələrlə bağlı mövqeyi dəqiq və aydındır: “Milli təşkilatlar arasında ümumi xətdə xırda istisnalarla ciddi bir ixtilaf yoxdur. Hamı etirazları dəstəkləyir, aksiyalarda milli şüarların səslənməsini istəyir.

Milli təşkilatların birgə bəyanatında da 4 əsas nöqtə var.

Birinci, milli dövlətçiliyin qurulması tələbidir. İkincisi odur ki, aksiyalarda Urmiya gölü ilə bağlı şüarlar səsləndirilməlidir. Üçüncü qadın hüquqlarının müdafiəsidir. Dördüncü tələb odur ki, bu rejim bütövlükdə getməlidir. Bu, əslində Azərbaycan türklərinin tələbidir”.

Əhməd Obalı Güney Milli Hərəkatının hədəflərinə də toxunub: “Millətimiz milli dövlətçiliyin qurulmasını istəyir. Hərəkatımız azadlıq hərəkatıdır. Milli dövlətçilik əsas şərtdir. Bunun əsas şərti isə istiqlaldır. Sonra quzeylə bütövləşməyə doğru getməliyik”.

Günaz.TV-nin rəhbəri bildirib ki, bu gün Güney Azərbaycan Milli Hərəkatının de-fakto rəhbəri Abbas Lisanidir: “O, bunu öz mübarizəsi ilə qazanıb.

Hazırda o, həbsdədir. Xaricdə fəaliyyət göstərən insanlarımız var. Millət əsas xəttə baxmalıdır. Biz istəklərimizdən geri durmamalıyıq. Biz Turana Bütöv Azərbaycandan sonra çata bilərik. İlk addım Güney Azərbaycanın azadlığı, sonra bütöv Azərbaycanın qurulması əsas hədəfdir”.