Ərdəbil dəmir əritmə zavodu və Zəncanın Ənquran bölgəsində yerləşən qurğuşun və sink mədəninin ixtisara düşmüş işçiləri, əmək haqlarını ala bilmədiklərinə və işsiz qaldıqlarına görə etiraz edirlər.

Qurğuşun və sink mədəninin ixtisara düşmüş işçiləri və  ətrafdakı kəndlərin əhalisi yerli işçilərin işdən çıxarılmasına və onların yerinə digər bölgələrdən olan işçilərin götürülməsinə etiraz olaraq şənbə günü «Kalsimin» şirkətinin binası önündə  toplaşıblar.

«Yerlilər işsiz ikən, mədənin başqa bölgələrdən gətirdiyi işçilər iş başındadır. Etirazlardan sonra Əmək və Məşğulluq İdarəsinin müdaxiləsi ilə bizə yenidən işə qaytarılacağımızı bildirdilər, lakin verilən vəd yerinə yetirilmədi», - deyə etirazçı işçilər bildirib.

Keçən iki il ərzində Ənquran mədəninin 200 işçisinin ixtisara düşdüyü bildirilir.

Ərdəbil dəmir əritmə zavodunun ixtisara düşmüş 88 işçisi isə uzun müddətdir əmək haqlarını ala bilmədikləri üçün dəfələrlə Əmək və Məşğulluq İdarəsi və Valilik binası önündə etiraz mitinqi keçiriblər. Lakin son məlumata görə, Ərdəbil prokuroru Nasir Ətəbati zavoddan 88 işçinin ixtisar edilməsi və önların 3 milyard tümən əmək haqqının şirkət tərəfindən ödənilməməsində İş və Məşğulluq İdarəsini günahkar elan edib. «İşçilər 18 aydır iş yerinə getmədiyi halda, İş və Məşğulluq İdarəsi onların ixtisara düşdüyünü qeyd etməyib. Məhz bu səbəbdən işçilər təxminən 3 milyard tümən məbləğində şirkətdən pul tələb edirlər. İş və Məşğulluq İdarəsi, işçilərin ixtisara düşdüyünü qeyd etmədiyi üçün onlar əmək haqlarını tələb etməkdə haqlıdır», - deyə prokuror bildirib.

Ərdəbil valisi Məcid Xudabəxş də sözgedən işçilərin iddiasının təmin olunacağını deyib. «Keçirilən bir çox iclaslardan sonra nəhayət ki, işçilərə olan 3 milyard tümən borcun ödəniləcəyinə qərar verilib. Bu barədə artıq nigaranlığa səbəb yoxdur», - deyə o bildirib.

Qeyd edək ki, Güney Azərbaycanda hökm sürən iqtisadi tənəzzül və durğunluq bir çox sənaye və istehsal müəssisəsini ciddi problemlərlə üz-üzə qoyub, hətta bir çoxunun bağlanmasına səbəb olub. Həmin müəssisələrdə çalışan işçilər isə əmək haqlarını vaxtı-vaxtında ala bilmir vəya ixtisar edilərək işsiz qalır.