46 yaşlı Cozef Tater 2024-cü ilin avqustunda Rusiya paytaxtında lüks bir hoteldə işçilərlə dava zamanı polis əməkdaşına hücum etmək ittihamı ilə həbs edilib.

Rusiyanın rəsmi TASS xəbər agentliyinin verdiyi məlumata görə, Moskva məhkəməsi martın 15-də tibbi müayinədən sonra Taterin məcburi psixiatriya xəstəxanasına yerləşdirilməsinə icazə verib. Həkimlər izah ediblər ki, Taterdə “stress, impulsivlik, təqib xəyalları və vəziyyəti ilə bağlı özünü dərk etməmək” əlamətləri var.

ABŞ-ın Moskvadakı səfirliyi məxfiliklə bağlı narahatlıqları əsas gətirərək, məsələ ilə bağlı şərh verməkdən imtina edib.

Taterin aprelin 14-də polis əməkdaşına hücum etmək ittihamı ilə məhkəməsi keçirilməli idi, bu ittihamla beş ilə qədər həbs cəzası nəzərdə tutulurdu. Məhkəmənin Taterin tibbi səbəblərə görə həbs edilməsi barədə qərarını nə vaxt qəbul etdiyi bəlli deyil, lakin TASS daha əvvəl Taterin martın sonunda məhkəməyə qədər azadlığa buraxıldığını bildirmişdi.

Tater sentyabr ayında keçirilən dinləmələrdə Rusiyaya siyasi sığınacaq istəməyə gəldiyini və Mərkəzi Kəşfiyyat İdarəsi (MKİ) tərəfindən təqib edildiyini iddia etmişdi.

TASS xəbər verir ki, Taterin müdafiəçisi onun zorla xəstəxanaya yerləşdirilməsi qərarına etiraz edib və hakimiyyəti müttəhimi cəmiyyətdən təcrid etməyə cəhddə ittiham edib.

İnsan haqları qrupları dəfələrlə Rusiyanı vətəndaşları siyasi baxışlarına görə psixiatriya müəssisələrinə məcbur etməkdə ittiham edib. Onlar deyirlər ki, prezident Vladimir Putin hökuməti sovet dövründəki təcrübədən getdikcə daha çox istifadə edir.

Tater “xırda iğtişaşlar” törətdiyinə görə inzibati xətalara görə məhkum edilib və 15 sutka həbs cəzası alıb.

Rusiyanın rəsmi xəbər agentlikləri Taterin 2024-cü ilin avqustunda sənədlərini görmək istəyən hotel işçilərinə hücumundan sonra saxlanıldığını bildirib. Agentliklərin bildirdiyinə görə, Tater söyüş söyüb və “aqressiv hərəkət” edib, hotel onu qəbul etməkdən imtina edib, sonra isə hadisə yerinə çağırılan polis məmurunun qolundan tutub.

Tater Rusiyada narkotik və ya hücum ittihamı ilə saxlanılan bir neçə amerikalıdan biridir, onların çoxu bir neçə il həbs cəzası çəkir. Onların arasında sərxoş halda qatarda iğtişaşdan sonra polis əməkdaşına hücum etməkdə təqsirli bilinərək 72 yaşında üç il yarımlıq həbs cəzası alan Robert Qilman və 2024-cü ilin iyulunda narkotik ittihamı ilə təqsirli bilinərək 13 il həbs cəzasına məhkum edilmiş musiqiçi Travis Leyk də var.