İran parlamentinin Firuzabad, Fərraşbənd və Qirov Karzin şəhərlərindən seçilmiş deputatı Kuruş Kərəmpur, fars politoloq və analitiki Sadıq Zibakəlamın Qaşqay qadınlarını təhqir etməsinə kəskin reaksiya verib.

Dekabrın 2-də Fərraşbənd şəhərinin cümə namazında jurnalistlərə açıqlama verən Kuruş Kərəmpur bildirib ki, o, Qaşqay qadınlarının aşağılanmasını, öz namusuna qarşı təhqir sayır: «Mən ciddi şəkildə bu məsələnin axırına qədər gedəcəyəm. Çünki mənim anam və şəhidlərin anaları təhqir olunub. Zibakəlamın Qaşqay qadınlarına qarşı işlətdiyi təhqiramiz ifadələr, mənim namusumun təhqir olunması deməkdir. Siyasi məsələləri bir qırağa qoyaq. Mən şəhidlərin ruhunu sevindirmək üçün bu məsələ ilə maraqlanacaq, işin axırına qədər gedəcəyəm».

İran hakimiyyətinin müxtəlif strukturları və cərəyanları ilə, o cümlədən də Sistemin Məsləhətini Müəyyənləşdirən Qurumun rəisi Haşimi Rəfsəncaniyə yaxınlığı ilə tanınan fars politoloq və analitiki Sadıq Zibakəlam, bir neçə gün əvvəl dövlət televiziyasında Hüseyn Dehbaşinin aparıcılığı ilə yayımlanan «Xeşt-i xam» verilişində Qaşqay qadınlarını «qaraçı» adlandırıb. O, bir neçə dəfə «Qaşqay qaraçı qadınları» ifadəsini işlətməklə, həm özlərinə məxsus mədəniyyəti və həyat tərzi olan qaraçıları, həm də igid və zəhmətkeş Qaşqay türk qadınlarını təhqir edib.

Onun Qaşqay qadınlarına qarşı bu təhqiramiz ifadələrinə etiraz bildirən ilk şəxs, urmiyalı deputat Nadir Qazipur olub. Bir qrup Qaşqay gəncləri də son günlər Şəhrza şəhərində plakatlar qaldıraraq Zibakəlama etiraz bildirərək, ondan Qaşqay xalqından üzr istəməsini tələb ediblər.